Nehemya 11 - MUKANDA WA MYIDI MUKULU

Mena a bena Yuda bavua bapingane mu Yerushalayime

¹ Bamfumu ba bantu kuyabu kusomba mu Yerushalayime. Kadi, ku bantu bakuabu bavua bashale, kusungulabu muntu umue pa dikumi, bua asombe mu Yerushalayime, tshimenga tshia tshijila. Bantu bakuabu tshitema pa dikumi kuyabu kusomba mu misoku ne mu bimenga bia mu ditunga.

² Bena Yuda bavua basankidila bikole, bela ka lumbandi, bantu bavua badianza kuitaba ku budisuile buabu, bua kuya kusomba mu Yerushalayime.

³ Bamfumu ba buloba bavua basombe mu Yerushalayime. Kadi bena Izrayele bakuabu: batuangaji, bena Levi, bena midimu mikuabu ya mu nzubu wa Mvidi Mukulu, too ne bantu ba ku ndelanganyi ya bena mudimu ba Shelomu, bavua basombe mu misoku yabu, muntu muende, muntu muende.

⁴ Kadi bamue bena tshisamba tshia Yuda, ne bantu bakuabu ba mu tshisamba tshia Binyamine, bavua baye kusomba mu Yerushalayime. Bena tshisamba tshia bena Yuda bavua basombe mu Yerushalayime bavua: Ataya, wa mu tshiota tshia Perese, wa ku ndelanganyi ya Malaleyele. Ataya uvua muana wa Uziya, Uziya uvua muana wa Zekarya, Zekarya uvua muana wa Amariya, Amanya uvua muana wa Shefatya.

⁵ Kuvua kabidi Masheya, muana wa Baruke, ne muikulu wa Koloze. Bankambua bende bavua: Azaya, Adaya, Yoyaribe, Zekarya, ne Shiloni.

⁶ Bantu bonsu ba bukitu ba mu tshiota tshia Perese bavua baye kusomba mu Yerushalayime bavua 468.

⁷ Bena tshisamba tshia Binyamine bavua basombe mu Yerushalayime bavua: Salu, muana wa Meshulame. Meshulame uvua muana wa Yowede, Yowede uvua muana wa Pedaya, Pedaya uvua muana wa Kolaya, Kolaya uvua muana wa Masheya, Masheya uvua muana wa Iti yele, Iti yele uvua muana wa Yeshaya,

⁸ Muvua kabidi Ngabayi ne Salayi. Bonsu basanga bavua 928.

⁹ Yowele, muana wa Zikri, uvua mulombodi wa tshisumbu atshi. Yekuda, muana wa Ashenuwa, uvua tshindonda tshia mulombodi wa tshimenga.

¹⁰ Batuangaji bavua:, Yedaya, muana wa Yoyaribe, Yakine,

¹¹ Seraya, muana wa Ilkiya, Ilkiya uvua muana wa Meshulame, Meshulame uvua muana wa Sadoke, Sadoke uvua muana wa Merayote, Merayote uvua muana wa Akitube, mutuangaji munene.

¹² Muvua kabidi bantu 822 ba mu tshiota tshiabu bavua benza mudimu mu nzubu wa Mvidi Mukulu. Muvua kabidi Adaya, muana wa Yerowame, Yerowame uvua muana wa Pelaliya, Pelaliya uvua muana wa Amsi, Amsi uvua muana wa Zekarya, Zekarya uvua muana wa Pashekure, Pashekure uvua muana wa Malkiya.

¹³ Muvua kabidi bantu 242 bamfumu ba meku ba mu tshiota tshiabu. Muvua kabidi Amashesayi, uvua muana wa Azarele, Azarele uvua muana wa Azayi, Azayi uvua muana wa Meshilemote, Meshilemote uvua muana wa Imere.

¹⁴ Muvua kabidi ne bena mvita 128 ba bukitu ba mu tshiota tshiende. Zabdyele, muana wa Agedolime, ke uvua ulombola bena mvita abu.

¹⁵ Bena Levi bavua: Shemaya, muana wa Ashube, Ashube uvua muana wa Azrikame, Azrikame uvua muana wa Ashabiya, Ashabiya uvua muana wa Bunyi.

¹⁶ Muvua kabidi Shabetayi ne Yozabade, bamfumu ba bena Levi, bavua ne midimu ya ku lupangu lua pambelu lua nzubu wa Mvidi Mukulu.

¹⁷ Muvua kabidi: Mataniya, muana wa Mika, Mika uvua muana awa Zabdi, Zabdi uvua muana wa Ashafe. Mataniya ke uvua utuma misambu mu nzubu wa Mvidi Mukulu diba dia kutendelela. Muanabu Bakbukiya ke uvua tshindonda tshiende. Abda uvua muana wa Shamuwa, Shamuwa uvua muana wa Ngalate, Ngalate uvua muana wa Yedutune.

¹⁸ Nanku, bena Levi bavua basombe mu tshimenga tshia tshijila bavua 284.

¹⁹ Balami ba biibi bavua 172: ke Akube, Talmone, ne bantu ba mu tshiota tshiabu.

²⁰ Kadi bena Izrayele bakuabu, nansha batuangaji ne bena Levi, bavua basombe mu misoku mikuabu ne mu bimenga bia mu ditunga dia bena Yuda, muntu muende muntu muende.

²¹ Bena midimu mikuabu ya mu nzubu wa Mvidi Mukulu bavua basombe mu tshitupa tshia Yerushalayime tshiyuabu binyike ne: Ofele. Bavua ku bumfumu bua Sika ne Ngishepa.

²² Uzi uvua mulombodi wa bena Levi bavua basombe mu Yerushalayime. Uvua muana wa Bani, Bani uvua muana wa Ashabiya, Ashabiya uvua muana wa Matatiya, Matatiya uvua muana wa Mika, wa mu tshiota tshia Ashafe tshivua ne mudimu wa misambu ne biombelu mu nzubu wa Mvidi Mukulu.

²³ Bena misambu bavua balonda mikenji ya mukalenga, ivua ibafundila mudimu wa kuenza ku dituku ne ku dituku.

²⁴ Petakiya, muana wa Meshezabele, wa mu tshiota tshia Zera, muana wa Yuda, uvua musombe mu lubanza lua mukalenga munene wa bena Persa bua kuakuila bena Izrayele.

Bena Yuda badi basomba mu misoku ne mu bimenga bikuabu

²⁵ Meku makuabu a tshisamba tshia bena Yuda avua masombe mu misoku ya ku mpenga: ke mu Kiriyate-Arba, ne mu misoku idi mutumba; mu Dibone ne misoku idi mutumba; mu Yekabseyele ne misoku idi mutumba;

²⁶ mu Yeshuwa, Molada, Bete-Pelete,

²⁷ Ashare-Shuwale, Bersheba ne misoku idi mutumba;

²⁸ mu Siklaje, Mekona ne misoku idi mutumba;

²⁹ mu Ene-Rimone, Sora, Yarmute,

³⁰ Zanowa, Adulame ne misoku idi mutumba; mu Lakishe ne misoku idi mutumba. Nanku bavua basombe pankatshi pa Bersheba, musoku uvua kuinshi mu ditunga, ne tshibanda tshia Inome tshia ku mutu mu ditunga.

³¹ Pashishe, bena meku a tshisamba tshia Binyamine bavua basombe mu: Ngeba, Mikmase, Aya, Betele ne mu misoku ivua mutumba;

³² mu Anatote, Nobe, Ananiya,

³³ Ashore, Rama, Ngitayime,

³⁴ Adide, Seboyime, Nebalale,

³⁵ Lode, Onone, ne mu tshibanda tshia Bena midimu ya bianza.

³⁶ Bena Levi bakuabu kumuangata mu bena Yuda, kuya kusomba mu bena Binyamine.