Biblia Todo Logo
အွန်လိုင်း သမ္မာကျမ်းစာ

- ကြော်ငြာတွေ -

Nehemya 10 - MUKANDA WA MYIDI MUKULU


Bena Izrayele badi balaya mua kulama meyi a Mvidi Mukulu

1 Bua malu onsu avua matuenzeke, tuetu bena Izrayele, tuetu kumyuangana kushindika bualu, kubufunda mu mukanda. Bamfumu, bena Levi, ne batuangaji betu, kufunda mena abu mu mukanda awu, kutua tshitampi.

2 Bavua bafunde mena abu mbobu aba: — Nehemya, muana wa Akalya, mulo mbodi wa ditunga. — Batuangaji bavua: Sedekiya,

3 Seraya, Azariya, Yirmeya,

4 Pashekure, Amanya, Malkiya,

5 Atushe, Shebanya, Maluke,

6 Arime, Meremote, Obadya,

7 Daniyele, Nginetone, Baruke,

8 Meshulame, Abiya, Miyamine,

9 Mazya, Bilgayi ne Shemaya.

10-14 Bena levi bavua: Yeshuwa, muana wa Azanya, Binuyi, wa mu tshiota tshia Enadade, Kadmiyele ne bana babu aba: Shebanya, Odya, Kelita, Pelaya, Anane, Mika, Rekobe, Ashabiya, Zakume, Sherebiya, Shebaniya, Odya, Bani ne Beninu.

15-28 Bamfumu balombodi ba bantu bavua: Paroshe, Pakate-Mowabe, Elame, Zatu, Bani, Buni, Azgade, Bebayi, Adoniya, Bigvayi, Adine, Atere, Izkiya, Azure, Odya, Ashume, Beshayi, Arife, Anatote, Nebayi, Magpiyashe, Meshulame, Ezire, Meshezabele, Sadoke, Yaduwa, Pelatiya, Anane, Ananiya, Osheya, Ananiya, Ashube, Alokesha, Pila, Shobeke, Rekume, Ashabna, Masheya, Akiya, Anane, Anane, Maluke, Arime ne Baana.

29 Nanku, bantu bonsu kudisangisha nabu ku malaya abu awu. Bantu abu bavua: batuangaji, bena Levi, balami ba biibi, bimbi ba misambu, bena midimu mishilangane ba mu nzubu wa Mvidi Mukulu, kabidi ne tuetu, bakaji betu, bana betu ba balume ne ba bakaji bakavua bakole, bakavua bumvua bivua bienzeka ebi. Tuetu bonsu katuvua babuelakane ne bantu ba bisamba bikuabu bavua bashala mu ditunga, kadi tuvua batumikile mikenji ya Mvidi Mukulu.

30 Nanku tuetu ne bana betu bakuabu, bakulu betu, tuetu kuditshipa bua kutumikila mikenji ivua Mvidi Mukulu muambile Moshe muntu wende, ne bua kukumbaja majinga a Maweja-Nangila Mvidi Mukulu wetu, kulama mikenji yonsu, ne kulonda mibelu yende.

31 Nanku, katuena basue kuselesha bana betu ba bakaji kudi bantu bavua bashale mu buloba buetu, patuvua mu bupika. Kabidi bana betu ba balume kabena mua kusela bakaji ba bantu aba to.

32 Dituku dia Dikisha, nansha dia tshibilu, pikala bantu aba basue kusumbisha ntete ya kuenza bukula, nansha bintu biabu bia mu madimi, katuena tubisumba to. Pashishe, netulekele kudima tshidimu tshia muanda mutekete, netulekelangane kabidi mabanza.

33 Tuetu kumyuangana bua kufila ku tshidimu ku tshidimu, kakanu ka tshiamu tshitoke tshia mushinga mukole ka bujitu bua grame inayi, bua midimu ya mu nzubu wa Mvidi Mukulu wetu.

34 Tudi tuenza nanku, bua tumone mua kupeta mampa a kulambula Mvidi Mukulu, nyama ya milambu ya kuosha, bia mu madimi bia kulambula dituku dionsu, milambu ya kulambula dituku dia Dikisha, dia ngondu mupiamupia, nansha matuku makuabu a tshibilu, milambu mikuabu ya kukobolola, idi bena Izrayele balambula Mvidi Mukulu. Ne tshiamu tshitoke tshia mushinga mukole atshi, netufute kabidi bonsu badi balongolola nzubu wa Mvidi Mukulu wetu.

35 Nanku, tuetu batuangaji, bena Levi, bantu bakuabu, tuvua batshinke, babanyangane mu meku etu, mudimu wa kufila, munkatshi mua tshidimu, nkunyi bua nzubu wa Mvidi Mukulu wetu. Bualu mukenji udi wamba ne: ku tshidimu ku tshidimu, nufile nkunyi mikumbane bua kuosha milambu pa tshilambuilu tshia Maweja-Nangila Mvidi Mukulu wenu.

36 Tshidimu tshionsu netufile kabidi mu nzubu wa Mvidi Mukulu bintu bia kumpala bia mu madimi, too ne bimuma bia mitshi yetu.

37 Netulambule kabidi banabute betu, ne banabute ba bimuna bietu mu nzubu wa Mvidi Mukulu. Ke mudi mukenji wamba. Banabute ba nyama ya ngombe, ya mikoku, ne bana ba mbuji yetu, netubifile mu nzubu wa Mvidi Mukulu, tubipesha batuangaji badi benza mudimu mu nzubu amu.

38 Nebipeshe kabidi batuangaji bukula buimpe, milambu ya bimuma, ya mvinyo mipiamipia ne ya mafuta. Nebiteke bionsu abi mu bibambalu bidi ku nzubu wa Mvidi Mukulu. Kadi bena Levi, nebapete tshia dikumi tshimue tshia bintu bia mu madimi etu, Bobu nkayabu nebaye kudiangatshila tshia dikumi atshi mu misoku yetu, miaba idi madimi ebi.

39 Nanku mutuangaji wa ku ndelanganyi ya Arone, neaye ne bena Levi, bua kuangata tshia dikumi atshi. Bena Levi nebafike ne tshia dikumi atshi mu nzubu wa Mvidi Mukulu, mu bibambalu mudibu bateka bintu bia mushinga.

40 Bena Izrayele ne bena Levi nebaye ne milambu ya ntete ya kuenza bukula, ya maluvu a mvinyo mapiamapia, ne ya mafuta, mu bibambalu abi, mudi kabidi bintu bia kuenza nabi mudimu muaba wa tshijila. Ke muaba udi kabidi batuangaji, balami ba ku biibi, ne bena misambu basombe, diba didibu bindila mudimu wa kuenza. Ke mutudi mua kuvuluka nzubu wa Mvidi Mukulu.

Bible avec Livres Deutérocanoniques en Tshiluba © Société Biblique de la R. D. Congo, 1996

Bible Society of the Democratic Republic of Congo
ကြှနျုပျတို့နောကျလိုကျပါ:



ကြော်ငြာတွေ