Nahume 3 - MUKANDA WA MYIDI MUKULU

Badi babutula tshimenga tshia bashipianganyi

¹ Diakabi ndiebe, tshimenga tshia bashipianganyi, tshimamuende wa bivi ne bena dishima, tshidi tshinema ne biuma bia bende, tshipawula katshiyi tshilekela!

² Teleja: mfimbu idi idila, nkata ya matempu yenza mutoyi, nyama ya tubalu inyema, matempu a mvita ashiya tshiona.

³ Babandi ba pa tubalu badi baya lubilu lukole, miele ya mvita idi ikenka, mafuma adi abalakana. Miaba yonsu tudi tumona bitalu mishiki ne mishiki, bungi kabuyi kubala, bantu badishindilapu!

Badi bafuisha Ninive bundu

⁴ Wewe Ninive uvua bu mukaji muena tshiendenda, ulobesha bantu ne buimpe buebe, kabidi ne majimbu ebe. Uvua mukuate bisamba ne matunga ku bupika, mubitekeshe ku buendenda ne majimbu biebe.

⁵ Maweja-Nangila wa bukole buonsu, udi wamba ne: Ninive, nenkunyoke, nenkukopuele bilamba ku mutu, mubandishe too ne ku mpala. Nenkushiye butaka ku mesu a bukua bisamba, bonsu nebakumone muudi.

⁶ Nenkubondakaje ne bitotshi, utue bundu. Nebishale tshilejilu tshidi tshikuatshisha bantu bowa!

⁷ Bantu bonsu badi bakumona, nebakunyeme. Nebele mbila ne: “Ninive mmubutuke, wabungama bualu buende nnganyi? Udi mua kumusamba, netumupete penyi?”

Nebakengeshe Ninive mmuabu bakengesha tshimenga tshia Tebe

⁸ Ninive udi mupite tshimenga tshia Tebe ku mushinga anyi? Bavua batshiase ku muelelu wa musulu wa Nile, mayi matshiele munkatshi, atshilama bimpe, bu mudi tshimana tshilama tshimenga.

⁹ Bena Kushe ne bena Ejipitu, bavua balambula tshimenga tshia Tebe bintu bia bungi. Bena ditunga dia Pute ne dia Libiya, bavua batua natshi ndondu.

¹⁰ Nansha bikale nanku, baluishi kukuata tshimenga, kuya ne benatshi mu bupika. Kushipelabu ne bana mene, ku mielelu ya misesu yonsu. Kusuikabu bamfumu bonsu nkanu. Bavua batshimuna, kuabanyanganabu bakulu ba tshimenga, bangata ewu bende ewu bende.

¹¹ Ne wewe kabidi Ninive, dikenga dinene nedikukuate, bu muntu mukuatshike maluvu. Neukebe muaba wa kusokoma, bua baluishi bebe kabakupetshi.

Ninive kena ne bukole bua kuipata baluishi

¹² Ninive, bimana biwabu bakukoleshe nabi, bidi bu bimuma bia mfiku, bimane kupia. Nyukisha amu mutshi, bimuma bidi bimata mukana mua udi ne nzala.

¹³ Bena mvita bebe badi amu bu bakaji. Biibi bikole bia bimenga bia mu ditunga diebe, bidi bidiunzulukila, baluishi babuela. Kapia kadi kosha mabaya adibu bapayike ku biibi.

¹⁴ Bena Ninive, sunayi mayi, bualu mvita neyinukuate. Koleshayi bimana bia tshimenga tshienu, longololayi biamu bia kuenza tushole.

¹⁵ Kadi nenufue, nebanuoshile mu tshimenga tshienu, nebanushipe mu mvita, nenubutuke bu mabeji, adi mpasu ya mikumbi idia, imana. Nuenu bena Ninive, nuvua bavulangane bu mpasu, idi ibuka bisumbu ne bisumbu.

Bena Ninive nebabutuke bonsu

¹⁶ Bangenda mushinga ba muebe bavua ba bungi, bapite mitotu ya mulu. Kadi mpindiewu mbakujimine, bu mudi mpasu ibuka, iya.

¹⁷ Batangidi ba bena mudimu bebe bavua batape bu mpasu, bena mudimu bebe bavua benda mabumbu, bu mpasu ya mikumbi diba dia mashika, idi ikila mu mitshi. Kadi padi munya ukola, idi ibuka. Kabena bamanye kudiyi iya. Eyowa, mmiye penyi?

Kabutu

¹⁸ Mukalenga wa bena Ashure, balombodi ba ditunga diebe mbafue kashidi. Balombodi ba bena mvita bebe, kabena banyunga kabidi. Bantu bebe mbatangalake pa mikuna. Kakuena muntu udi mua kubasangisha.

¹⁹ Mbakubutule kashidi, mbakutape mputa wa lubangu. Bantu bonsu badi bumvue muudi mubutuke, badi basanka, bakuma bikashi. Bualu uuvua kuyi mukengeshe, ne tshikisu tshiebe katshiyi tshipungila nnganyi?