Muambi 6 - MUKANDA WA MYIDI MUKULU

¹ Mvua mumone kabidi dinga dikenga dipite bunene pa buloba, didi muntu kayi mua kumvua.

² Tuambe ne: Mvidi Mukulu mmupeshe muntu kampanda bubanji, biuma ne lumu lunene. Muntu awu udi ne bionsu bidiye ujinga. Kadi Mvidi Mukulu kena musue bua asanke nabi to. Muntu mukuabu udi ubidia. Bualu abu mbualu bubi, ndikenga dipite bunene!

³ Muntu udi mua kulela bana lukama, kulala kabidi panu bidimu bivule. Kadi bionsu ebi nebimuenzele tshinyi padiye kayi ne diakalenga matuku onsu adiye ulala panu, kabidi padi bantu kabayi mua kumujika bimpe? Ndi ngamba ne: muana wa tshibika mmumupite ku diakalenga.

⁴ Bualu muana ewu mbamuimite patupu, mmubuele mu miidima kayi dina, kabayi bamuvuluke.

⁵ Kavua mumone diba, kawa mumanye mudi panu, mmupete dikisha divua muntu uvua mulale panu bikole kayi nadi.

⁶ Muana awu mmupite muntu udi mushale ne muoyi nansha bidimu binunu bibidi, kadi kayi ne diakalenga. Ku ndekelu kua bionsu, buonsu babidi nebaye muaba wa momumue.

⁷ Muntu udi wenza mudimu nangananga bua amone mua kudia kuukuta. Kadi nzala udi amu uyipeta.

⁸ Panu apa muntu wa meji udi mushindu umue ne muntu mutshimbakane. Padi mupele mumanye mua kusomba panu nebunulengelele ku tshinyi?

⁹ Bidi bimpe kusanka ne biudi nabi pa muntu pa kukeba bikuabu bia mishindu yonsu, bualu abi bidi kabidi patupu bu kuipatangana ne lupepele.

Mibelu ya meji

¹⁰ Bionsu bidi bienzeka lelu, mbamane kubijadika kale. Tudi bamanye kabidi muntu muende mudiye: kena mua kuelangana mpata ne udi mumupite makanda to.

¹¹ Patudi tuelangana mpata, miaku yetu kayena itupetesha tshintu. Tshia nsongu tshituapetaku ntshinyi?

¹² Muntu udi upita lubilu panu bu mundidimbi. Udi mumanye tshia nsongu tshidi muntu mua kuenza matuku makese adiye usomba panu nnganyi? Muntu nansha umue kena mua kumumanyisha kabidi bidi ne bua kuenzeka pa buloba, yeye mumane kufua.