Muambi 3 - MUKANDA WA MYIDI MUKULU

Tshintu tshionsu tshidi ne tshikondu tshiatshi

¹ Bionsu bidi bienzeka pa buloba bidi ne tshikondu tshiabi.

² Kudi tshikondu tshidibu bakulela, ne tshikondu tshia kufua, tshikondu tshia kukuna biakudia ne tshikondu tshia kubipola.

³ Tshikondu tshia kushipa ne tshikondu tshia kuondapa mputa, tshikondu tshia kubutula ne tshikondu tshia kuibaka.

⁴ Kudi tshikondu tshia kudila muadi, ne tshikondu tshia kuseka, tshikondu tshia kutua mikemu, ne tshikondu tshia kuja maja.

⁵ Kudi tshikondu tshia kuela mabue, ne tshikondu tshia kuakungija. Kudi tshikondu tshia kupukilangana, ne tshikondu tshia kubenga kupukilangana.

⁶ Kudi tshikondu tshia kukeba, ne tshikondu tshia kujimija; tshikondu tshia kulama ne tshia kuimansha,

⁷ tshikondu tshia kupanda bilamba, ne tshikondu tshia kubitela. Kudi tshikondu tshia kupuwa, ne tshikondu tshia kuakula.

⁸ Kudi tshikondu tshia kunanga ne tshikondu tshia kukina; tshikondu tshia mvita ne tshia ditalala.

⁹ Kadi tshia nsongu tshidi muntu upeta ku midimu idiye ukuata ne lutatu ntshinyi?

¹⁰ Mvua mutangile midimu mikole idi Mvidi Mukulu mupeshe bantu.

¹¹ Bionsu bidi Mvidi Mukulu muenze bidi bimpe, udi ubikumbaja ne tshikondu tshiabi. Uvua mutupeshe kabidi ne dijinga dia kumanya bia kale ne bitshidi kumpala. Kadi katuena mua kujingulula bionsu bidi Mvidi Mukulu wenza, biangatshile ku ntuadijilu too ne ku ndekelu nansha.

¹² Nanku meme kumvua ne: Diakalenga didi muntu nadi didi amu kusanka, ne kusomba bimpe panu patshidiye ne muoyi.

¹³ Pikala muntu mua kudia, kunua ne kusanka ne bia ku mudimu wende, ndipa dia kudi Mvidi Mukulu.

¹⁴ Mvua mujingulule ne bionsu bidi Mvidi Mukulu muenze, kabiena biandamuka to. Kakuena tshidibu mua kusakidila nansha kumusha. Mvidi Mukulu udi wenza nanku bua bantu bamunemeke.

¹⁵ Bidi bienzeka mpindiewu bikavua bimane kuenzeka kale. Bionsu abi Mvidi Mukulu udi ubipingaja misangu ne misangu. Bitshidi kumpala kabidi bikadi bimane kuenzeka.

Malu mabi a panu

¹⁶ Telejayi mundi mumone kabidi malu makuabu adi panu: bantu badi bakengeshangana muaba uvuabu mua kulongolola malu bimpe, kukosa nsambu pa yoyi.

¹⁷ Mvua muele meji mu muoyi wanyi ne: Mvidi Mukulu nealumbuluishe muntu muimpe bu mudiye ulumbuluisha muntu mubi, bualu tshintu tshionsu tshidi tshienzeka tshikondu tshiatshi, kabidi malu onsu atudi tuenza Mvidi Mukulu mmuamone.

¹⁸ Ndi ngela meji ne: Mvidi Mukulu mmusue kuteta bantu bua kubaleja ne: kanuena nupita nyama ku mushinga to.

¹⁹ Bualu ndekelu wa muntu udi amu wa momumue ne wa nyama. Mudi muntu ne mueyelu, nyama udi nawu. Bionsu bibidi bidi ne bua kufua momumue. Muntu kena mupite nyama ku tshintu nansha tshimue to, bualu ku ndekelu bionsu bidi tshianana.

²⁰ Muntu ne nyama ku ndekelu nebiye muaba umue; nebipingane mu buloba, buvuabu babifuke nabu.

²¹ Kakuena muntu nansha umue udi mua kujadika mudi muoyi wa muntu ubanda mu diulu, ne mudi wa nyama ujimina mu buloba.

²² Nanku ndi mumone ne: kakuena bidi mua kusankisha muntu bipite bia ku disanka dia mudimu wende. Ke bionsu bidiye ne bua kuenza panu, bualu kakuena udi mua kumupingaja pa buloba bua amone bidi ne bua kuenzeka kunyima kuende.