Muadi 5 - MUKANDA WA MYIDI MUKULU

Maweja-Nangila, utupingaje kuudi

¹ Maweja-Nangila, kupu muoyi malu adi matuenzekele. Tangila, umone mudibu batupenda.

² Bintu bietu bia bumpianyi mbabinyenge kudi bantu bakuabu. Nzubu yetu mbayangate kudi bantu benyi.

³ Batatu mbafue. Mpindiewu tudi bashale bana ba nshiya. Bamamuetu mbashale bakaji bakamba.

⁴ Tukadi tusumba mayi a kunua mu biina bietu, tufuta bua kuangula nkunyi yetu.

⁵ Badi batukengesha badi batulonda. Tudi bapungile, kadi katuena ne dikisha to.

⁶ Bua kudia kuukuta, tudi tuoluela bena Ejipitu ne bena Ashure tshianza.

⁷ Bankambua betu bavua benza bibi, mbamane kufua. Kadi tuetu ke badi bambule bujitu bua malu abu mabi.

⁸ Bapika ke badi bamfumu betu. Kakuena muntu nansha umue udi mua kutupikula ku bianza biabu.

⁹ Bua kupeta tshiakudia, tudi tudiela mu njiwu ya lufu mu bipela mudi bantu basombela ne bia lufu ku bianza.

¹⁰ Bua nzala mikole idi itusuma, dikoba dietu didi dituosha bu dia bantu badi mu tshikutu tshia kapia.

¹¹ Badi babuelela bakaji ba mu Siyone mu nzubu ku bukole, banyanga nsongakaji ya mu bimenga bia Yuda itshidi tumama.

¹² Bavua bakuate balombodi ba mu bukalenga babowe. Badi babenga kunemeka bakulu ba ditunga.

¹³ Bansongalume badi bambula dibue dia tshipelelu, bana ba balume badi batetuka, bua bujitu bua nkunyi.

¹⁴ Bakulu ba ditunga kabatshiena basomba mu tshipangu bua kufila lungenyi. Bansongalume mbalekele kuimba nzenze yabu.

¹⁵ Muoyi wetu kawena ne disanka. Tshianga tshituvua tutua ntshiandamuke madilu.

¹⁶ Buneme buetu mbujike! Tudi ne diakabi, bualu tuvua benzele Maweja-Nangila bibi.

¹⁷ Muoyi wetu udi usama munda, mesu etu adi muwule ne binsonji,

¹⁸ bualu mukuna wa Siyone mmukudimuke tshipela, mmuandamuke tshisombelu tshia nyama ya mibuabua.

¹⁹ Kadi wewe, Maweja-Nangila, udi mukalenga bua kashidi, udi mfumu kashidi ne kashidi tshiendelele.

²⁰ Neutupue muoyi, neutubenge matuku onsu atutshidi ne muoyi panu anyi?

²¹ Utupingaje kuudi, Maweja-Nangila, bua tupingane kuudi bulelela. Utuakajile nsombelu wetu, bu muvuaye bangabanga.

²² Neutubengelemu kashidi anyi?