Muadi 3 - MUKANDA WA MYIDI MUKULU

Nansha mu dikenga, ndi amu ne ditekemena

¹ Maweja-Nangila mmunkengeshe; mmunkume bisusu ne tshiji.

² Kungipataye kumpala kuende. Kungendeshaye mu miidima pa mutu pa kungendesha mu butoke.

³ Amu meme nkayanyi, ke udiye ukengesha matuku onsu kayi upungila.

⁴ Kumfubishaye mubidi mujima ku mutu too ne ku makasa. Kuntshibulaye mifuba.

⁵ Kuntuminaye makenga ne ntatu. Kunnyungulukilabi bu bimana bia nzubu wa lukanu.

⁶ Uvua mungele mu miidima, mudi bantu bamane kufua kale.

⁷ Uvua munnyungulule ne bimana bua tshimonyi mua kupatukamu, munsuike ne nkanu.

⁸ Meme kuela mbila, ndomba diambuluisha. Mvidi Mukulu kubenga bimvua mulombe.

⁹ Uvua munjikile njila ne mishiki ya mabue. Meme kuya mu njila wa tshianana.

¹⁰ Uvua mungalamine bu nyama wa lonji, mudi nyama wa ntambue mubutame mu tshisuku.

¹¹ Kumpangishaye tshimvua mua kuenza bua kuikala ne muoyi. Kuntekeshaye, kumpuwisha kashidi.

¹² Kunanaye buta buende, kunteka bu tshintu tshia kulongela ndudi.

¹³ Mikete yende yonsu kutubula mutshima wanyi.

¹⁴ Bantu bonsu badi banseka, bandembakaja matuku onsu.

¹⁵ Kunnuishaye bintu bia bululu. Dikenga kunkuata bu maluvu.

¹⁶ Kundishaye nsoka ku bukole, kundiatakajaye mu buloba.

¹⁷ Kumbushaye ditalala mu mutshima wanyi, meme kupua muoyi mudi diakalenga.

¹⁸ Meme kuamba ne: tshiena ne ditekemena dikuabu, matuku atshidi kumpala, tshiena mua kuindila tshintu nansha tshimue kudi Maweja-Nangila.

¹⁹ Kuvuluka bundu ne dilalakana bianyi kudi kungenza bululu bu lulengu.

²⁰ Muoyi wanyi udi uvuluka bionsu bidi binnemenena bujitu.

²¹ Kadi teleja malu andi musue kuvuluka, adi mua kumpesha ditekemena:

²² Ke buimpe bua Maweja-Nangila budi kabuyi bujika, dinanga diende didi kadiyi ndekelu.

²³ Buimpe buende budi bumueneka dinda dionsu. Maweja-Nangila, wewe udi ukumbaja malaya ebe!

²⁴ Ndi ngamba ne: Maweja-Nangila udi bumpianyi buanyi. Ke pandi ntekemena kudiye.

²⁵ Maweja-Nangila udi muimpe, usankisha muntu yonsu udi umueyemina, uvuluka yonsu udi umukeba.

²⁶ Bidi bimpe kuindila ne lutulu lupandu ludi Maweja-Nangila ukutumina.

²⁷ Bidi bimpe bua muntu anyishe majitu makole, avuabu bamubambidike mu buana buende.

²⁸ Padi Maweja-Nangila umutumina dikenga, asombe pa nkayende mupuwe talalaa.

²⁹ Atue mishiku panshi, mutekemene ne: Maweja-Nangila neangambuluishe.

³⁰ Afile ditama kudi udi umukuma, nansha mudie bipendu muukute.

³¹ Bualu Maweja-Nangila katu ubenga muntu tshiendelele.

³² Nansha yeye ukengesha muntu, udi umufuila luse, bualu buimpe buende mbupite bunene.

³³ Kena usanka padiye unyingalaja bantu, nansha padiye ubatatshisha.

³⁴ Padibu badiatakaja bena lukuna bonsu ba mu ditunga ku makasa,

³⁵ padibu banyanga buneme bua muntu kumpala kua Mvidi Mukulu Muena kulu,

³⁶ padibu bakosa tshilumbu tshia muntu bibi, Maweja-Nangila kena umona anyi?

³⁷ Nganyi udi mua kutuma diyi musangu amu umue, bualu kuenzekabu? Amu Maweja-Nangila ke udi wenza nanku.

³⁸ Ku bidi Mvidi Mukulu Muena kulu wamba, ke kudi kufumina bionsu, diakabi nansha diakalenga.

³⁹ Kadi muntu udi wabakana bua tshinyi? Nansha yeye ne mibi, ki mbamushipe to!

⁴⁰ Tudikonkayi menemene bua nsombelu wetu, tupinganayi kudi Maweja-Nangila.

⁴¹ Tutendelelayi ne muoyi wetu mujima, tuoluele Mvidi Mukulu wa mu diulu bianza.

⁴² Tuvua bakutombokele. Kadi wewe Maweja-Nangila kuena mutufuile luse to.

⁴³ Bu muuvua muwule ne tshiji, wewe kutuipata, kutushipa kuyi ne luse.

⁴⁴ Wewe kuya kule, kusokoma kunyima kua divuba. Nanku kutendelela kuetu kakuvua mua kufika kuudi.

⁴⁵ Wewe kutuenza bintu bia bukoya, bu bunyawu, munkatshi mua bisamba bikuabu.

⁴⁶ Baluishi betu bonsu badi babulula mbanga, bua kutukeba matandu.

⁴⁷ Tshidi tshituindila tuetu: ke bowa ne dijimba, tshinyangu ne dibutuka.

⁴⁸ Mesu anyi adi apuekesha binsonji bu mayi a musulu, bua dibutuka dia bena tshisamba tshianyi.

⁴⁹ Mesu anyi adi mpokolu wa mayi adi kaayi akama. Bualu katuena ne dikisha nansha dikese.

⁵⁰ Ndi ngindila too ne padi Maweja-Nangila winama panshi, bua kutangila ne kumona malu aa.

⁵¹ Bualu budi buenzekela nsongakaji ya mu tshimenga tshianyi, budi bunnyingalaja bikole.

⁵² Bantu badi bankina tshianana bavua bangipate bu nyunyi.

⁵³ Bavua bangele mu tshiina, meme ne muoyi, banteke mabue pambidi.

⁵⁴ Mayi kubanda, kumpita bule. Meme kudiambila ne: ndi pamue ne kufua.

⁵⁵ Pamvua panshi mu dijimba, meme kukubikila wewe, Maweja-Nangila.

⁵⁶ Uvua mungumvue pamvua nkuela lubila: “Kujibiki matshi ebe ku mikemu yanyi ne ku muadi wanyi nansha.”

⁵⁷ Pamvua mukubikile uvua musemene pabuipi nanyi. Wewe kungambila ne: “Kutshinyi nansha.”

⁵⁸ Maweja-Nangila, wewe kungakuila, wewe kumpandisha.

⁵⁹ Maweja-Nangila uvua mumone malu mabi avuabu bangenzele, uvua mukose nsambu yanyi pa yoyi.

⁶⁰ Uvua mumone muvuabu badisombuele. Uvua mumone bifufu bibi bivuabu bangelele.

⁶¹ Maweja-Nangila uvua mumvue bipendu ebi, ne meji mabi avuabu bangelele.

⁶² Matuku onsu baluishi banyi badi banjana, bangelela meji mabi.

⁶³ Tangila bionsu bidibu benza: badi anu bangela nsenda mu misambu yabu.

⁶⁴ Maweja-Nangila, wewe neubenzele mudibu bangenzele meme.

⁶⁵ Neubuikile lungenyi luabu. Mitshipu yebe neibenzele bibi.

⁶⁶ Neubipate ne tshiji; neubabutule pa buloba.