Muadi 2 - MUKANDA WA MYIDI MUKULU

Maweja-Nangila udi uluisha Yerushalayime

¹ Eyi! Bua tshiji tshiende, Maweja-Nangila udi ubuikila Yerushalayime ne mavuba! Butumbi buvua Izrayele nabu mu diulu, kubuimanshaye panshi pa buloba. Pavuaye mufikile Siyone munda, kavua muvuluke muvua Siyone muikale tshidiatshilu tshia makasa ende nansha.

² Maweja-Nangila kubutula buloba bua bantu bende, kayi luse. Bua tshiji tshiende, kushimbulaye bimenga bia Yuda, bivuabu bakoleshe ne bimana. Kunyangaye bukalenga, kufuishaye balombodi babu bundu.

³ Bua tshiji tshiende tshikole, kutekeshaye bukole buvua Izrayele nabu. Kubengaye kumuambuluisha, pavua muluishi wende mumuvuile. Kuelaye kapia munkatshi mua bantu bende. Kavua kuosha bionsu.

⁴ Bu muluishi, kunanaye buta buende. Kushalaye mubunane ne diboku diende dia balume. Kudilejaye mudiye muluishi wetu. Kunyangaye bionsu bivua bitulengelela ku mesu. Kuitshikijaye tshiji tshiende bu kapia pa nzubu wa Mvidi Mukulu wa mu Yerushalayime.

⁵ Maweja-Nangila mmudienze muluishi wetu. Kupulaye nzubu mimpe yonsu ya mu Izrayele. Kushimbulaye bimenga bivuabu bakoleshe ne bimana. Kutampakajaye dibungama ne mikemu miaba yonsu mu tshisamba tshia bena Yuda.

⁶ Kutulaye lupangu lua nzubu wende, kunyangaye muaba uvuaye usambakena netu. Maweja-Nangila kupesha bena Siyone tshipua muoyi tshia matuku a disanka ne tshia dituku dia Dikisha. Kulejaye tshiji tshiende: kupetulaye bakalenga, ne batuangaji kabidi.

⁷ Maweja-Nangila mmubenge tshilambuilu tshiende; mmulekele muaba wende wa tshijila; mmufile nzubu mimpe ya Siyone mu bianza bia baluishi. Bobu kuenza mutoyi mu nzubu wa Mvidi Mukulu, mutoyi mukole bu dituku dia bisangilu binene.

⁸ Maweja-Nangila uvua mushindike bua kubutula bimana bia Yerushalayime. Kubiupulaye bionsu, kulandakaja. Tshibumba ne bimana kuela muadi, bionsu kupuka musangu umue.

⁹ Biibi bia tshimenga kupuka. Mvidi Mukulu kutshibula milonda ya kukanga nayi biibi abi. Mukalenga ne balombodi ba mu bukalenga buende, badi mu bianza bia bantu ba bisamba bikuabu. Kakuena muntu udi mua kuamba tshidi Mvidi Mukulu musue; nansha bambi mene kabatshiena bapeta mukenji wa kudi Mvidi Mukulu.

¹⁰ Bafidi ba ngenyi ba mu Siyone badi basomba panshi, bapuwa. Badi badiela buloba mu mitu, baluate bilamba bia madilu. Nsongakaji ya mu Yerushalayime idi yenda miname panshi.

¹¹ Mesu anyi mmakunze ne muadi. Kanyinganyinga kadi kantonda. Tshiena ne ditekemena kabidi, bualu tshisamba tshianyi ntshibutuke. Bana ba mu maboku badi bafua ne nyota mu misesu ya mu tshimenga.

¹² Bana badi bakonka mamuabu ne: “Biakudia biepi?” Badi balewuka mu misesu ya mu tshimenga, bu bantu badibu batapa mputa. Badi bakula muoyi mu maboku a mamuabu.

¹³ Yerushalayime, tshiena ne tshia kukuambila. Kakuena dikenga ditudi mua kufuanyikija ne diebe! Tshifuanyikiji tshikuabu kayi, tshindi mua kutela bua kukusamba, Siyone, nsongakaji musuibue? Dibutuka diebe ndinene bu mayi manene. Kakuena muntu udi mua kudijikija.

¹⁴ Bambi bebe mbakuambile anu meyi a dishima ne a tshianana. Kabavua bakusokoluela bubi buebe. Bualu ebu ke buvua mua kukudimuna dikenga diebe. Meyi avuabu bakuambile avua anu a dishima a kukudinga nawu.

¹⁵ Bantu bonsu badi bapitshila muaba ewu, badi bakuma bikashi bua dibutuka diebe. Badi bela bibingu, bakupa mitu, bakuseka wewe, Yerushalayime, bebejangana ne: “Etshi ke tshimenga tshivuabu babikila ne: Mulengele be, kabidi ne: Disanka dia buloba bujima, anyi?”

¹⁶ Bonsu badi bakukina, badi babulula mukana bua kukukeba matandu. Badi bakuela bibingu, badia dinu, bamba ne: “Tudi bamumine. Dituku dituvua bindile, ndiodi edi! Tudi bafikemu, tudi badimone!”

¹⁷ Maweja-Nangila mmuenze tshivuaye muele meji, mmukumbaje tshivuaye muambe, tshivuaye mushindike ku kale. Mmubutule kayi ne luse. Uvua musankishe muluishi ne dikenga diebe, uvua mukoleshe ditambisha dia muena lukuna webe.

¹⁸ Yerushalayime, ela mbila yebe kudi Maweja-Nangila, tuaku mikemu bikole. Puekesha binsonji munya ne butuku, bungi bu mayi a musulu. Kulekedi, kukoshi muadi nansha!

¹⁹ Kupuwi to! Asa amu muadi ku diba ne ku diba, dila butuku bujima. Ambila Maweja-Nangila bionsu bidi munda muebe. Umuoluele bianza, umutendekene, bua bana bebe, badi benda bafua ne nzala ku mielelu yonsu ya njila, bapete muoyi.

²⁰ Maweja-Nangila, tangila umone bantu baudi ukengesha. Bakaji badi mua kufika ku didia dia bana bavuabu balele, bavuabu bakongoluele mu maboku ne dinanga, anyi? Bantu badi mua kushipa batuangaji ne bambi, too ne mu muaba webe wa tshijila anyi?

²¹ Bana ne bakulumpe mbafue panshi miandanda, ku mielelu ya njila. Nsongakaji ne nsongalume yanyi idi mifue ku muele wa mvita. Wewe kubashipa dituku diuvua mufike munda, kubabutula bonsu, kuyi ubafuila luse.

²² Wewe kubikila bena mutumba bamvua ntshina bikole, mudibu babikila bantu dituku dia disanka. Maweja-Nangila, dituku diuvua mufike munda, kakuvua muntu nansha umue uvua munyeme, nansha uvua mushale ne muoyi. Bana bamvua mukoleshe, bamvua mukongoluele mu maboku ne dinanga, muluishi kubashipa bonsu.