Misambu 99 - MUKANDA WA MYIDI MUKULU

Maweja-Nangila udi mukalenga, udi wa tshijila

¹ Maweja-Nangila udi mukalenga, bantu badi bazakala. Nkuasa wende wa bukalenga udi pa mutu pa batumibue bende badi bashale mu diulu, buloba budi butenkakana.

² Maweja-Nangila udi munene mu Siyone, — Eyowa, udi ku mutu kua bantu bonsu.

³ Bakutumbishe wewe Mvidi Mukulu munene, udi ukuatshisha bantu bonsu bowa! — Eyowa, udi wa tshijila!

⁴ Batumbishe bukole buebe, wewe mukalenga udi munange buakane. Wewe ke udi muelele bantu mikenji ya nsombelu muimpe, wewe ke udi mujadike buakane, ne bulongolodi mu Izrayele.

⁵ Tumbishayi Maweja-Nangila, Mvidi Mukulu wetu, bua bunene buende, numukukuile ku bidiatshilu bia makasa ende. — Eyowa, Maweja-Nangila udi wa tshijila.

⁶ Moshe ne Arone, ba munkatshi mua batuangaji bende, Samuwele wa munkatshi mua bavua babikila dina diende, bonsu aba kubikilabu Maweja-Nangila. Yeye uvua ubitaba.

⁷ Mvidi Mukulu uvua ubambila meyi ende mu dikunji dia muinshi, bavua batumikila meyi ende ne mikenji ya nsombelu muakane bivuaye ubelela.

⁸ Maweja-Nangila Mvidi Mukulu wetu, uvua ubitaba, wewe ke Mvidi Mukulu uvua ubaleja lutulu, kadi uvua mubanyoke bua malu mabi abu.

⁹ Tumbishayi Maweja-Nangila, numukukuile pa mukuna wende wa tshijila, bualu Maweja-Nangila Mvidi Mukulu wetu, Eyowa, udi wa tshijila.