Misambu 97 - MUKANDA WA MYIDI MUKULU

Maweja-Nangila udi mukalenga, disanka dikale pa buloba bujima

¹ Maweja-Nangila udi mukalenga, buloba bujima busanke, bantu bonsu badi kule basanke!

² Dituku ne miidima bidi bimunyungulukila. Buakane ne dikosa dia nsambu, ke bidi bishindika bukalenga buende.

³ Kapia kadi kadianjila kumpala kuende, kadi kuosha baluishi bende, kabanyunguluka nseke yonsu.

⁴ Miele ya mvula idi ikenkesha bantu, buloba budi buyimona, buzakala.

⁵ Mikuna minene idi yenguluka bu manyi kumpala kua mukalenga wa buloba bujima.

⁶ Diulu didi dimanyisha buakane buende, bantu bonsu badi bamona butumbi buende.

⁷ Bundu bukuate bonsu badi batendelela mvidie, ne badi badianyisha bua mvidie ya tshianana. Mvidie yonsu idi itumbisha Maweja-Nangila.

⁸ Bena Siyone badi bumvua, basanka, bimenga bia mu Yuda bidi bisanka, bua meyi audi mushindike.

⁹ Bualu wewe Maweja-Nangila, ke udi Mvidi Mukulu Muena kulu pa buloba bujima, udi ku mutu kua mvidie.

¹⁰ Nuenu badi banange Maweja-Nangila, nukine malu mabi. Maweja-Nangila udi ulama mioyi ya badi bamulamata, udi ubapandisha kudi bantu babi.

¹¹ Munya udi utema bua bantu bakane, bantu ba mioyi miakane, bobu badi ne disanka.

¹² Nuenu bantu bakane, nusanke bua Maweja-Nangila, numutumbishe, nuvuluke tshijila tshiende.