Misambu 89 - MUKANDA WA MYIDI MUKULU

Dilaya divuabu balaye Davide ndiye penyi?

1 Kasala ka kudi Etane, muena muabu .

¹ Kasala ka kudi Etane, muena muabu.

² Maweja-Nangila, nengimbe bulenga buebe matuku onsu, nemmanyishe bantu bulelela buebe mu bikondu bionsu.

³ Ndi ngamba ne: Malu ebe mempe mmashindame kashidi, bulelela buebe mbujalame mu diulu.

⁴ Wewe uvua muambe ne: “Mvua mutue ndondu, ne muntu umvua musungule, ne Davide muena mudimu wanyi, mvua mumulaye ne:

⁵ Nenjadike umue wa ku ndelanganyi yebe mu bukalenga tshiendelele. Nenteke bantu ba ku ndelanganyi yebe mu bumfumu buebe, mu bikondu bionsu.”

⁶ Maweja-Nangila, batumibue, ba mu diulu batumbishe malu ebe a kukema, badibu nabu mu diulu batumbishe bulelela buebe!

⁷ Maweja-Nangila, kuena ne wa kukuidikija nende mu diulu amu, nansha ku bamvidie bonsu, kakuena mvidie udi bu wewe.

⁸ Mvidi Mukulu, badi bakutshina mu tshipangu, tshia batumibue ba Mvidi Mukulu, badi bapita kukutshina kudi badi bannyungulukila.

⁹ Maweja-Nangila, Mvidi Mukulu wa bukole buonsu, udi bu wewe nnganyi? Maweja-Nangila, bukole ne bulelela bidi bikunyungulukile.

¹⁰ Wewe ke udi utekesha bukole bua mayi manene, ne ubatamija mavuala padiwu mafike munda.

¹¹ Wewe ke uvua musompole Rakabe nyama munene wa tshidika, uvua mumusunsule. Uvua mumuangalaje baluishi bebe, ku bukole bua tshianza tshiebe.

¹² Diulu ndiebe, buloba mbuebe kabidi, wewe ke udi muase buloba bujima, ne bionsu bidipu.

¹³ Wewe ke udi mufuke ku mutu kua ditunga, ne kuinshi kuadi, mukuna wa Tabore ne wa Ermone, idi isamuna dina diebe.

¹⁴ Wewe ke udi ne diboku didi ne bukole, dinkomu diebe didi ne bukole, tshianza tshia balume tshidi tshiolola.

¹⁵ Buakane ne nsambu milelela, ke bidi bukalenga buebe bushindamena. Malu mimpe ne bulelela bidi bienda kumpala kuebe.

¹⁶ Maweja-Nangila, badi bakukumina bikashi badi ne disanka! Badi benda ne disanka ku mesu kuebe.

¹⁷ Badi badianyisha bualu udi Mvidi Mukulu wabu, badi baditumbisha matuku onsu, bua muoyi webe umue.

¹⁸ Wewe ke udi bukole buabu butambe bunene, udi ujula mpala yetu mulu ku diambuluisha diebe.

¹⁹ Ngabu wetu, ngua Maweja-Nangila mukalenga wetu, ngua Mvidi Mukulu wa tshijila wa bena Izrayele.

²⁰ Dituku dikuabu uvua muleje bualu, wewe kuakula, wambila bantu bebe badi bakulamata ne: “Ndi muambuluishe muntu wa bukitu, ndi musungule nsongalume wa bantu bonsu.

²¹ Ndi mupete Davide bua ikale muena mudimu wanyi, ndi mumujidile ne mafuta anyi a tshijila.

²² Nemmukankamike ne tshianza tshianyi tshia bukole, bukole buanyi nebumukoleshe.

²³ Muluishi kena mua kumujikila nansha, ntomboji kena mua kumufuisha bundu.

²⁴ Nensunsule baluishi bende, yeye mutangile, nentape badi bakeba kumushipa.

²⁵ Malu anyi mimpe ne bulelela buanyi nebikale kudiye, meme ke wadiundisha bumfumu buende.

²⁶ Nemmuteke mfumu wa mayi manene, neatumine misulu ya mayi diyi.

²⁷ Neambikile ne: ‘Wewe udi Tatu wanyi, Mvidi Mukulu wanyi, dibue dia lupandu luanyi.’

²⁸ Nemmuteke muananyi muanabute, mupite bakalenga ba pa buloba ku bunene.

²⁹ Nemmuleje malu anyi mempe matuku onsu, ndi ntua nende ndondu, mmulaye ne:

³⁰ Nenjadike ndelanganyi yende matuku onsu, bonsu bapingana mu bukalenga buende, nebashale kashidi bu mudi diulu dikale.

³¹ “Pikala ndelanganyi yebe mibenga mikenji yanyi, kayiyi ilonda bindi nyambila,

³² pikalabu banyanga mikandu yanyi, kabayi balama meyi anyi,

³³ diba adi nengangate mukombu, bua kunyoka bupidia buabu, nembakume mitshi bua kunyoka tshilema tshiabu.

³⁴ Kadi tshiena ndekela kubaleja luse luanyi, tshiena mpanga kulama diyi dianyi dimue.

³⁵ Tshiena ngupula ndondu wanyi nansha, tshiena nkudimuna meyi amvua mupatule mukana muanyi.

³⁶ Mvua muditshipe ne: nansha bu mundi Mvidi Mukulu, tshiena mua kushima Davide nansha kakese.

³⁷ Ndelanganyi yende neyitungunuke, nenyitabalele, bonsu bapingana mu bukalenga buende nebashindame,

³⁸ bu mudi ngondu mushindame kashidi, bu mujadiki mulelela mu diulu.”

³⁹ Kadi wewe udi mubenge mukalenga uuvua mujidile, udi mumulekele, udi mumufikile munda.

⁴⁰ Udi mupule ndondu uuvua mutue ne muena mudimu webe, udi munyange tshifulu tshiende tshia bumfumu, mutshiela panshi.

⁴¹ Udi mupule bimana biende bionsu bia kudilama nabi, udi mubutule bimana biende, bia kukolesha nabi musoku.

⁴² Bantu bonsu badi bapita mu njila, badi bamunyenga bintu, udi mpindiewu tshintu tshidi bena mutumba baseka.

⁴³ Wewe kukankamika baluishi bende, kusankisha bena lukuna bende.

⁴⁴ Udi mutshipaje muele wende wa mvita, kuvua mumuambuluishe mu mvita to.

⁴⁵ Wewe kumunyenga bukole buende, kutonkola nkuasa wende wa bukalenga panshi.

⁴⁶ Udi mukepeshe matuku a bunsongalume buende, mumufuishe bundu mesu tente.

⁴⁷ Maweja-Nangila, neusokome kashidi anyi? tshiji tshiebe netshioshe bu kapia too ne diba kaayi?

⁴⁸ Umvuluke, matuku anyi a panu adi makese! Badi mua kuamba ne: udi mufuke bantu bua patupu!

⁴⁹ Mmuntu kaayi udi mua kushala ne muoyi kayi ufua? Nganyi udi mua kudisungidila ku lufu?

⁵⁰ Maweja-Nangila, malu ebe mempe a kale awu, ne malaya ebe malelela auvua mulaye Davide, mbiye penyi?

⁵¹ Maweja-Nangila, uvuluke bipendu, bidi bantu ba bungi bampenda, meme muena mudimu webe. Uvuluke mundi ngangata mu mubidi wanyi bipendu biabu.

⁵² Maweja-Nangila, baluishi bebe badi bapenda, badi bapenda mukalenga uudi mujidile, bulelela badi bamupenda padiye upita.

⁵³ Maweja Nangila, tudi tukuela tuasakidila kashidi! Amene, eyo, bikale nanku!