Misambu 88 - MUKANDA WA MYIDI MUKULU

Ndi pamue ne lufu

1 Musambu wa mu mukanda wa misambu ya bena Kora. Wa mu mukanda wa mulombodi wa bena misambu. Wa kuimba mu dibungama. Kasala ka musambu kela kudi Emane, muena muabu .

¹ Musambu wa mu mukanda wa misambu ya bena Kora. Wa mu mukanda wa mulombodi wa bena misambu. Wa kuimba mu dibungama. Kasala ka musambu kela kudi Emane, muena muabu.

² Maweja-Nangila, Mvidi Mukulu, musungidi wanyi, mu munya ndi ndomba diambuluisha diebe, butuku ke meme kuimana kumpala kuebe.

³ Anyisha, uteleje mundi nkutendelela, teleja muadi wanyi.

⁴ Bulelela ndi ne makenga a bungi, ndi pabuipi ne lufu.

⁵ Bantu bonsu badi bammona bu muntu mufue, bu muntu udi kayi ne bukole.

⁶ Ndi musombe munkatshi mua bafue, bu mudi bitalu biladika mu lukita. Kuena ubavuluka kabidi, kuena ubenzela bualu nansha bumue.

⁷ Uvua mungele mu kandondu ka bafue, mu miidima mikole ya lufu.

⁸ Udi muntekele tshiji tshikole, udi unkengesha ne mavuala.

⁹ Udi mungipatshile banyi balunda, ndi muenze tshintu tshibipe kudibu. Ndi muinjidile mu nzubu kudi makenga, tshiena mua kumupatuka.

¹⁰ Mesu anyi mmafue bua dibungama. Maweja-Nangila, dituku dionsu, ndi nkubikila, bua ungambuluishe, ndi nkuolela bianza.

¹¹ Udi mua kuenzela bafue bualu bua kukema anyi? Bafue badi mua kujuka ku bafue bua kukutumbisha anyi?

¹² Badi mua kuamba malu ebe ku bafue, nansha bulelela buebe ku musoku wa bafue anyi?

¹³ Badi mua kumanya malu ebe a kukema mu miidima mikole anyi? Mu ditunga didi bantu bikale ne tshipua muoyi, badi mua kumanya buakane buebe anyi?

¹⁴ Maweja-Nangila meme ndi nkubikila bua ungambuluishe, ndi nkutendelela kubangila ku dinda.

¹⁵ Maweja-Nangila, udi umbenga bua tshinyi? Bua tshinyi kuena musue kummona?

¹⁶ Ndi ne dikenga kubangila ku buana buanyi, ndi pabuipi ne lufu. Udi munkuatshishe bowa, ndi ne dipampakana.

¹⁷ Tshiji tshiebe tshidi tshinkengesha bu kapia, mvita yebe idi imbutula.

¹⁸ Matuku onsu idi injingila nseke yonsu, bu mudi mayi apasalala mu musulu.

¹⁹ Udi mungipatshile banyi balunda bonsu. Amu miidima ke idi pabuipi nanyi.