Misambu 81 - MUKANDA WA MYIDI MUKULU

Eyi, bu bantu banyi banteleja…!

1 Musambu wa mu mukanda wa mulombodi wa bena misambu, wa mu mukanda wa misambu ya Asafe. Musambu wa kuimba ne lunzenze lua Ngate .

¹ Musambu wa mu mukanda wa mulombodi wa bena misambu, wa mu mukanda wa misambu ya Asafe. Musambu wa kuimba ne lunzenze lua Ngate.

² Nuelele Mvidi Mukulu mbila ya disanka, udi utulama, nukumine Mvidi Mukulu wa Yakobe bikashi.

³ Imbayi musambu, nuimbe ne ngoma, ne lunkombe ludi ne muadi muakane ne lunzenze.

⁴ Nuele mpungi padi ngondu ubala, padiye utokesha bikole, ne mu dituku dietu dia tshibilu.

⁵ Bualu etshi ke mudimu wa bena Izrayele, dipangadika dia Mvidi Mukulu wa Yakobe,

⁶ mukenji uvuaye muelele Yozefe, pavuaye uluisha bena Ejipitu. — Meme kumvua diyi, dindi tshiyi mumanye, dingambila ne:

⁷ Ndi mukumbushe bujitu buvua pa makaya ebe, bianza biebe mbilekela tshisaka tshia bujitu.

⁸ Pauvua mu dikenga, wewe kumbikila, meme kukupandisha. Meme kukuitaba mu tshipepela tshikole. Meme kukuteta ku mayi a Meriba.

⁹ Bantu banyi nunteleje, ndi nnudimuja! Bena Izrayele, bu nuenu banteleje!

¹⁰ Kanuena mua kuikala ne mvidie mukuabu munkatshi muenu! Kanutendeledi mvidie ya bena bisamba bikuabu.

¹¹ Bualu meme ke Maweja-Nangila, Mvidi Mukulu wenu, uvua munupatule mu Ejipitu. Bulula mukana bikole, nemmuwuje tente.

¹² Kadi bantu banyi, kabena bumvua diyi dianyi, bena Izrayele badi bambenga.

¹³ Nenku, meme kubalekela mu tshitunu tshiabu, bua benze tshidibu basue.

¹⁴ Bu bantu banyi, bena Izrayele banteleja, bu bobu balonda njila undi mubaleje,

¹⁵ diakamue nentekeshe baluishi babu, nenkume bena lukuna babu.

¹⁶ Pashishe baluishi ba Maweja-Nangila, nebalekele ditambisha diabu, bena Izrayele nebasombe talalaa too ne tshiendelele.

¹⁷ Maweja-Nangila neabadishe ne ntete mimpe ya kuenza bukula, neabukutshishe ne buitshi bua muitu.