Misambu 79 - MUKANDA WA MYIDI MUKULU

Tudi badishinda panshi, luaku utuambuluishe

1 Musambu wa mu mukanda wa misambu ya Asafe.

¹ Musambu wa mu mukanda wa misambu ya Asafe. Eyi, Mvidi Mukulu, bantu benyi mbanyange muaba webe uudi usomba, mbashiye mikiya mu nzubu webe wa tshijila, Yerushalayime mmushale kabutu.

² Bitalu bia bena mudimu bebe mbabidie, kudi nyunyi ya mikanku, ne minyinyi ya bantu bebe bakane kudi nyama ya tshisuku.

³ Bitalu bia bakulamatshi bebe bidi panshi, miaba yonsu mu Yerushalayime, kakuyi muntu udi mua kubijika.

⁴ Tuetu aba, bena mutumba badi batupenda, badi netu pabuipi badi batulembakaja.

⁵ Maweja-Nangila neutulaminyine tshiji atshi tshikole, ne mukawu udi wosha bu kapia musangu bule munyi?

⁶ Benyi aba badi kabayi bakumanye, ne makalenga adi kaayi akutendelela, ubafikile bonsu munda.

⁷ Bualu bavua bapawule Izrayele, bavua banyangakaje muaba wende.

⁸ Kututandishi bua bilema bia bantu bavua badianjile kumpala kuetu, kadi bua dinanga diebe, pingana kutudi. Kujingakanyi to, bualu tudi badishinde panshi menemene.

⁹ Mvidi Mukulu musungidi wetu, luaku utuambuluishe, bualu lumu luebe mbalunyange, utupandishe, utufuile luse, bualu butumbi buebe ke budibu bapepeja.

¹⁰ Bantu benyi badi batukonka ne: “Mvidi Mukulu wabu udi wenza tshinyi?” Kadi bamanye ne: tudi basue kumona muudi usombuela, bua lufu lua bena mudimu bebe.

¹¹ Uteleje ne luse miadi ya bena lukanu. Wewe udi ne bumfumu bunene, upandishe bantu badibu bakeba kushipa.

¹² Maweja-Nangila, bisamba bitudi nabi mutumba bidi bikuluisha, ubipingajile misangu muanda mutekete bipendu biabu, bivuabu bakupenda.

¹³ Kadi tuetu bantu bebe, mikoku ya mu tshikumbi tshiebe, netukuimbile misambu kashidi, tukutumbishe mu nkama ne nkama ya bidimu.