Misambu 77 - MUKANDA WA MYIDI MUKULU

Mvidi Mukulu pandi mu dikenga, ndi mvuluka malu ebe a dikema a ku kale

¹ Musambu wa mulombodi wa bena misambu. Wa Yedutune. Musambu wa mu mukanda wa misambu ya Asafe.

² Ndi ndidila Mvidi Mukulu ne diyi dikole bua dikenga dianyi. Ndi ndidila Mvidi Mukulu bua anteleje.

³ Ndi nkeba Maweja-Nangila pandi mu dikenga, ndi mmuoluela bianza butuku bujima, tshiyi mpungila ndi mbenga bua muntu kansambi.

⁴ Pandi mvuluka Mvidi Mukulu, ndi ntua mikemu, pandi ngela meji ndi nteketa mu maboku.

⁵ Maweja-Nangila udi umpesha tshitabela, ndi ntata mpanga tshindi mua kuamba.

^6-7 Ndi mvuluka matuku mapite, ndi ngela meji a bikondu bia kale, ndi ndala ngela meji butuku bujima. Ndi nganyina, nkeba mua kujingulula.

⁸ Maweja-Nangila neatubenge kashidi anyi? Kena kabidi netu bualu anyi?

⁹ Maweja-Nangila udi mutuipate kashidi anyi? Kena kabidi ne tshia kutuambila anyi?

¹⁰ Mvidi Mukulu mmupue muoyi bua kutufuila luse anyi? Mmutubenge bua padiye ne tshiji anyi?

¹¹ Ndi ngamba ne: “Bualu budi buntonda budi bua Mvidi Mukulu wa bukole buonsu, kena kabidi netu bualu.”

¹² Maweja-Nangila, ndi mvuluka bionsu biuvua muenze. Eyowa, ndi ngela meji ku malu ebe a kukema a kale.

¹³ Ndi nganyisha biudi muenze, ndi nganyisha malu audi muenze tshiyi mua kupua muoyi.

¹⁴ Eyi! Mvidi Mukulu, njila webe udi wa tshijila, kakuena mvidie mukuabu udi munene bu wewe Mvidi Mukulu.

¹⁵ Wewe nkayebe ke udi wenza malu a dikema, udi muleje bisamba bikuabu bumfumu buebe,

¹⁶ Uvua mupikule bantu bebe ku bukole buebe, ndelanganyi ya Yakobe ne ya Yozefe.

¹⁷ Eyi, Mvidi Mukulu, padi mayi akumona, avua akuatshika bowa, avuanduluka too ne muinshi muawu.

¹⁸ Mavuba akapatula muenji mukole, munkatshi mua mayi muvua mikungulu ya mvula, miketa yebe ivua ipitakana nseke yonsu.

¹⁹ Munkatshi mua mikungulu ya mvula, mipenya ivua ikuatshisha bantu bowa, buloba buvua buzakala ne bowa.

²⁰ Mvidi Mukulu uvua mupande njila mu mayi manene, uvua wendela muinshi mua mayi manene muntu kavua mua kumona dikasa diebe.

²¹ Uvua muteke Moshe ne Arone, bua bashale balami ba bantu bebe.