Misambu 74 - MUKANDA WA MYIDI MUKULU

Mvidi Mukulu, uvuluke bantu bebe

1 Kasala ka mu mukanda wa misambu ya Asafe .

¹ Kasala ka mu mukanda wa misambu ya Asafe. Mvidi Mukulu wanyi, udi mutubenge kashidi bua tshinyi? Udi mutulamine tshiji bua tshinyi? Tuetu bikale mikoku ya mu tshikumbi tshiebe?

² Uvuluke bantu bebe bauvua mudisunguile ku kale. Kupu muoyi bisamba biuvua mupikule, mubienze biebe. Kuvulaminyi mukuna wa Siyone, muaba uuvua musue kusomba.

³ Ubande mu makolu: baluishi mbanyange nzubu webe mujima wa tshijila.

⁴ Bena lukuna bebe bavua bela mbila ya disanka, mu nzubu webe, muaba mene uudi usomba. Bavua bimanyikamu mabendela abu, baleja mudibu batshimune.

⁵ Bavua benza nzubu awu bu muaba wa kupuila mitshi, bela bisuyi mulu, bu badi bakosa mitshi muitu,

⁶ banyanga bimana bienza ne mabaya malengeja, babipanda bonsu pamue ne ngindu, kabidi ne milonda.

⁷ Bavua bosha nzubu webe wa tshijila, bamupula panshi, bamupisha mikiya.

⁸ Bavua batuamba ne: “Netubabutule bonsu! Netoshe nzubu yonsu ya kutendelela idi mu ditunga diabu.”

⁹ Kakutshiena bidi bileja ne: wewe udi munkatshi muetu. Bambi kabatshiena bamanyisha malu. Kakuena wa kutudi udi mumanye ne: ebi nebijike diba kaayi.

¹⁰ Mvidi Mukulu wanyi, muluishi neakusendeke kabidi matuku bungi munyi? Muena lukuna neakuseke kashidi anyi?

¹¹ Kuena musue kutuambuluisha bua tshinyi? Muudi muele maboku panyima, mulengulule bualu ebu mbishi?

¹² Kadi kuonsu eku Wewe udi Mukalenga wetu. Kale uvua muenze malu a dikema pa buloba.

¹³ Wewe wakapandulula mayi manene ku bukole buebe, wakaboza mitu ya bidika bia mu mayi.

¹⁴ Uvua muzaze kabalubalu ka tshidika tshia Leviyatane, mutshidishe kudi nyama ya mu tshipela.

¹⁵ Uvua mupatule mayi mu mpokolu ne mu tusulu, mumishe misulu minene ivua kayiyi mua kukama.

¹⁶ Uvua mufuke munya ne butuku, muteke diba ne ngondu pa muaba wabi.

¹⁷ Uvua mushindike mikalu ya buloba, muenze tshikondu tshia luya ne tshia mashika.

¹⁸ Maweja-Nangila, vuluka mudi muluishi ukufunyina, mudi bantu batatakane aba bakuseka.

¹⁹ Kutupu muoyi tuetu bapele bebe, tunkudimba tuebe, kutueledi nyama ya lonji.

²⁰ Vuluka ndondu iuvua mutue netu. Bena tshinyangu badi mu ditunga dijima, too ne mu miaba ya ku mpenga.

²¹ Badi batukengesha, batunyenga bionsu. Utusungidile, tumone mua kukutumbisha.

²² Mvidi Mukulu wanyi, juka, udiakajile bualu buebe. Vuluka mudi bantu batatakane aba bakupenda diba dionsu.

²³ Kupu muoyi mbila idi baluishi bebe bela. Mitoyi ya bena lukuna bebe idi ivulangana matuku onsu.