Misambu 72 - MUKANDA WA MYIDI MUKULU

Mvidi Mukulu, elaku mukalenga lupemba

1 Wa mu mikanda ya Shelomu.

¹ Wa mu mikanda ya Shelomu. Mvidi Mukulu wanyi, upeshe mukalenga meji, akose nsambu pa yoyi bu muudi uyikosa. Upeshe muana wa mukalenga lungenyi, alonde dikasa diebe.

² Alombole bantu bende, kayi ne kansungasunga. Ambuluishe badibu bakengesha kapayi bualu.

³ Ku bulongolodi buende, bupole bubuele mu ditunga, bubanji bupueke mu mikuna.

⁴ Mukalenga akose nsambu ya bapele pa yoyi, ambuluishe bena dikenga, abutule badi babakengesha!

⁵ Alale panu aboboke bu diba ne muenji, mu ndelanganyi ne ndelanganyi ya bantu.

⁶ Bukalenga buende bulengelele bantu, bu mudi mvula uloka mu madimi, walengeja, bu mudi mvula wa mudimbi utotesha buloba, ubufukisha.

⁷ Matuku adiye mu bukalenga, bakose nsambu amu pa yoyi. Bupole ne diakalenga bivulangane mu ditunga, too ne muajimina ngondu kashidi!

⁸ Mukalenga adie bumfumu ku mayi manene too ne ku makuabu, ku musulu wa Perate too ne ku ntengu ya buloba.

⁹ Baluishi bende nebatue binu kumpala kuende. Bena lukuna nebadiele panshi, bamukukuile.

¹⁰ Bakalenga ba mu Tarshishe ne ba mu bidila bia kule, nebamutumine malambi, ba mu Saba ne ba mu Seba bamutuadile milambu.

¹¹ Bakalenga bonsu nebamukukuile, bisamba bionsu nebimuenzele mudimu.

¹² Neapikule muena dikenga udi umusengelela, kabidi ne mupele udi kayi ne mumuambuluishi.

¹³ Neambuluishe udi kayi ne bukole, kabidi ne muena dikenga. Neabatatshile bua bapande.

¹⁴ Neabepule ku tshinyangu ne kabutu, bualu udi ubananga, musue bua bashale ne muoyi.

¹⁵ Mukalenga akole bobobu! Bantu bamulambule mpawungi wa mu Saba, batendelela, bamulombele diba dionsu, basengelela Mvidi Mukulu buatshia buila bua amuele lupemba.

¹⁶ Ntete ya kuenza bukula, ivulangane mu ditunga. Biakudia bitoloke bia bungi mu mikuna, bisampile bu mu mikuna ya Lebanone, biele miepu bungi bu bisosa bia mu mpata!

¹⁷ Lumu lua mukalenga lushale kashidi, bamutumbishe too ne muajimina diba tshiendelele! Bantu belangane lupemba, bamba ne: Mvidi Mukulu akusankishe, muvuaye muenzele mukalenga! Mu matunga onsu bantu bamutue makumbu!

¹⁸ Tuele Maweja-Nangila, Mvidi Mukulu wa Izrayele, tuasakidila. Amu Yeye ke udi wenza malu a dikema.

¹⁹ Tuele Mvidi Mukulu tuasakidila! Lumu luende ndunene! Butumbi buende bumueneke mu buloba bujima! Amene, eyo, bikale nanku!

20 Ke ndekelu wa misambu ya Davide, muana wa Ishayi.

²⁰ Ke ndekelu wa misambu ya Davide, muana wa Ishayi.