Misambu 71 - MUKANDA WA MYIDI MUKULU

Maweja-Nangila, kundekedi mu bukulumpe buanyi

¹ Maweja-Nangila, ndi nyemena kuudi, kumfuishi bundu.

² Bu muudi ukumbaja malaya ebe, unsungidile, mupikule. Unteleje ne ntema, umpandishe.

³ Wikale lubuebue, muaba mukole undi mua kusokomena. Eyowa, wewe udi lubuebue, muaba undi mua kupetela lupandu.

⁴ Mvidi Mukulu wanyi, ungepule ku bianza bia bantu babi, ku tshinyangu tshia bivi ne bakengeshanganyi.

⁵ Maweja-Nangila, Mvidi Mukulu, ndi nkutekemena, nkueyemina biangatshile ku buana buanyi.

⁶ Katshia bandela, wewe ke tshipanda wa nshindamenu. Katshia ngamona diba, amu wewe ke uvua mundame. Ke pandi nkutumbisha diba dionsu.

⁷ Bantu ba bungi bavua bela meji ne: Wewe uvua muntshipe. Kadi Wewe ke tshianyi tshipanda tshia kushindamena.

⁸ Ndi nkuimbila misambu, nkutumbisha! nkusamuna matuku anyi onsu.

⁹ Nkadi mukulumpe, kundekedi to. Tshitshiena ne bukole, kunshiyi nkayanyi.

¹⁰ Baluishi banyi badi bangelela bifufu bibi, bakeba mudibu mua kunshipa, bamba ne:

¹¹ “Mvidi Mukulu kena kabidi nende ne bualu. Tumuipate, tumukuate, kakutshiena udi mua kumunyenga mu bianza bietu.”

¹² Mvidi Mukulu, kuikadi nanyi kule. Mvidi Mukulu wanyi, luaku lukasa, ungambuluishe!

¹³ Badi bansonguela, bundu bubakuate, babutuke! Badi bankebela diakabi, ubafuishe bundu, bupuke lumu.

¹⁴ Kadi meme matuku onsu ndi nkutekemena amu wewe. Nenkutumbishe misangu ne misangu.

¹⁵ Dituku dijima nengambile bantu muudi ukumbaja biuvua mulaye. Nembalondele muudi utusungidila, utuenzela bilenga kabiyi kubala.

¹⁶ Maweja-Nangila, Mvidi Mukulu wanyi, nemmanyishe bantu muudi ne bukole, muudi Wewe nkayebe wenza bionsu amu biakane.

¹⁷ Mvidi Mukulu wanyi, udi mundongeshe biangatshile ku buana buanyi. Too ne lelu, ntshidi amu mmanyisha malu a dikema audi muenze.

¹⁸ Mvidi Mukulu wanyi, nkadi ne nsuki mitoke, kadi kundekedi. Nanku nemmone mua kumanyisha bana banyi ne biikulu banyi, muudi ne bukole, wenza malu a dikema.

¹⁹ Mvidi Mukulu, buakane buebe budi butua mulu, butua panshi. Udi muenze malu a dikema! Mvidi Mukulu wanyi, kakuena udi mufuanangane nebe.

²⁰ Udi mummueneshe mabika ne mala. Kadi neumfululule, ungepule ku lukita.

²¹ Neunsambe ne lelu kabidi. Neumpingajile ne lumu luanyi luvuabu banyange.

²² Mvidi Mukulu wanyi, nenkuimbile misambu ne lunzenze. Nenkutumbishe bualu udi muena diyi dimue. Mvidi Mukulu wa tshijila wa Izrayele, nenkusamune ne lunkombe.

²³ Nenkuimbile misambu, nkuela tunkunduluila, bualu uvua mumpikule.

²⁴ Bu muudi ukumbaja malaya ebe, nenkutumbishe buatshia buila. Bonsu bavua bakeba kumbutula, bundu bubakuate, bupuke lumu.