Misambu 7 - MUKANDA WA MYIDI MUKULU

Maweja-Nangila, kosa nsambu yanyi pa yoyi

1 Kayenga ka mu mukanda wa misambu ya Davide, kavuaye muele Maweja-Nangila pavua Kushe, muena Binyamine, mumufunde .

¹ Kayenga ka mu mukanda wa misambu ya Davide, kavuaye muele Maweja-Nangila pavua Kushe, muena Binyamine, mumufunde.

² Maweja-Nangila Mvidi Mukulu wanyi, ndi nyemena kuudi. Umpandishe, unsungile kudi bonsu badi bankengesha.

³ Kuyi mumpandishe, nebansunsule bu ntambue, udi ubakula nyama, wende ukoka kakuyi udi mua kumunyenga.

⁴ Maweja-Nangila Mvidi Mukulu wanyi, bu meme muenze bidibu bamba, bu meme munyange bianza bianyi ne bubi,

⁵ bu meme mupingaje bubi ku bubi, nansha munyenge tshintu tshia udi unkina kapayi bualu,

⁶ nanku muluishi andondakaje, ankuate, antue miseba, andiatakaje pantshidi ne muoyi. Bualu nkadi muena tshibawu tshia lufu!

⁷ Maweja-Nangila, juka panshi, tshiji tshiebe tshilunduke. Imana pankatshi petu ne bena tshikisu badi bankengesha. Undumbuluile, bualu wewe udi ukosa nsambu pa yoyi.

⁸ Sangisha bisamba bionsu pabuipi nebe. Zangama ku mutu kuabi mu nkuasa webe wa butumbi.

⁹ Maweja-Nangila, wewe mulumbuluishi wa bisamba, kosa tshilumbu tshianyi pa tshiotshi, leja buakane buanyi patoke ku bantu.

¹⁰ Jikija buenzayi bua bantu babi. Kankamika badi bakulamata. Wewe Maweja-Nangila muena buakane, ujingulule meji ne majinga bidi munda mua muntu.

¹¹ Mvidi Mukulu udi ngabu wanyi, udi upandisha bantu badi bamuitaba.

¹² Mvidi Mukulu udi mukoshi muakane wa nsambu. Dituku dionsu udi unyoka badi benza malu mabi.

¹³ Padi muluishi kayi udilengeja, udi unona muele wende wa mvita. unana buta buende, uludikila.

¹⁴ Udi wangata biende bia lufu, wasa mikete yende idi misuika kapia.

¹⁵ Muntu udi wanyisha bubi, udi wimita diakabi, ulela dishima.

¹⁶ Udi umbuila bakuabu tshiina tshile, neadishinde mu tshiina tshiende atshi.

¹⁷ Bubi buvuaye mulongoluele bakuabu, nebumupingene pa mutu, tshikisu tshidiye natshi netshimuimane mu mpala.

¹⁸ Nentumbishe Maweja-Nangila bua buakane budiye mungenzele. Ndi nsamuna dina dia Mvidi Mukulu, Muena kulu.