Misambu 63 - MUKANDA WA MYIDI MUKULU

Dinanga diebe ndipite muoyi

1 Musambu wa mu mukanda wa misambu ya Davide. Mmuusake pavuaye musokome mu tshipela tshia Yuda .

¹ Musambu wa mu mukanda wa misambu ya Davide. Mmuusake pavuaye musokome mu tshipela tshia Yuda.

² Mvidi Mukulu, wewe udi Mvidi Mukulu wanyi. Udi munsamine muoyi. Ndi nkujinga. Ndi ne nyota yebe, amu bu mudi buloba bume bujinga mayi.

³ Mvua nkenzakana mu nzubu muebe, nkukeba, bua kumona bukole ne butumbi biudi nabi.

⁴ Dinanga diudi munnange nadi, ndipite muoyi ku mushinga. Ke pandi nkutumbisha,

⁵ nkuela tuasakidila matuku onsu andi ne muoyi. Nengele bianza mulu bua kukusamuna.

⁶ Wewe udi unsankisha. Ndi bu muntu udi udia, uukuta mu didia dia tshibilu. Nenkutumbishe, nkuela mbila ya disanka.

⁷ Nansha mu bulalu, ndi nkuvuluka. Butuku bujima ndi ngela meji kuudi.

⁸ Udi mulue kungambuluisha. Ke pandi ngela mbila ya disanka mu mapuapua ebe.

⁹ Ndi nkulamata muanyi muonsu. Udi unshindika ne tshianza tshiebe tshia bukole.

¹⁰ Bantu badi bakeba kunshipa, babutuke diakamue, bapueke mu kandondu ka bafue!

¹¹ Babatape ku muela wa mvita, bitalu biabu babidie kudi mibuabua!

¹² Mukalenga neasanke bualu bua Mvidi Mukulu! Bonsu badi baditshipa, bajadika malu, batela dina dia Mvidi Mukulu, mbena diakalenga. Kadi bena dishima nebabapuwishe!