Misambu 6 - MUKANDA WA MYIDI MUKULU

Maweja-Nangila, kunnyoki

1 Musambu wa mu mukanda wa mulombodi wa bena misambu. Wa kuimba ne lunzenze lua nshinga muanda mukulu. Musambu wa mu mukanda wa misambu ya

¹ Musambu wa mu mukanda wa mulombodi wa bena misambu. Wa kuimba ne lunzenze lua nshinga muanda mukulu. Musambu wa mu mukanda wa misambu ya Davide.

² Maweja-Nangila, udi mumfikile munda, kadi kunnyoki. Udi muntekele tshiji, kadi lekela kunkengesha.

³ Maweja-Nangila, umfuile luse, ndi mu dikenga dipite. Unkankamike, tshitshiena ne bukole.

⁴ Muoyi udi undubakana munda. Kadi wewe, Maweja-Nangila, neundengulule ne ku diba kaayi?

⁵ Maweja-Nangila, kolesha, unsungidile. Umpandishe, bualu wewe udi mulenga mupite.

⁶ Meme mufue, tshiakukuvuluka kabidi to. Mu kandondu ka bafue wakutumbisha nnganyi?

⁷ Mikemu yanyi mmimpungije. Butuku bujima ndi ndila amu kudila, mbolesha bulalu buanyi ne binsonji.

⁸ Mesu mmanguwule ne muadi. Mmanyanguke ne binsonji bualu bua baluishi banyi.

⁹ Umbukayi kundi, nuenu benji ba bibi. Maweja-Nangila mmuteleje miadi yanyi.

¹⁰ Mvidi Mukulu mumvue mitendekenu yanyi. Mmuanyishe dilomba dianyi.

¹¹ Nanku baluishi banyi bonsu, bundu ne buowa nebibakuate. Nebasemene kule, bundu mesu tente.