Misambu 58 - MUKANDA WA MYIDI MUKULU

Mvidi Mukulu udi ukosa nsambu pa yoyi

1 Musambu wa mu mukanda wa mulombodi wa bena misambu. Wa kuimba ne meyi a musambu wa “Kunyangi…”. Kasala ka mu mukanda wa misambu ya Davide .

¹ Musambu wa mu mukanda wa mulombodi wa bena misambu. Wa kuimba ne meyi a musambu wa “Kunyangi…”. Kasala ka mu mukanda wa misambu ya Davide.

² Bamfumu ba pa buloba, nusombele nukosa nsambu pa yoyi anyi? Panudi nulumbuluisha bantu, nutu nupisha bena tshibawu anyi?

³ Nansha kakese. Nutu nubingisha muena tshibawu munudi basue. Ke munudi nubueja tshinyangu mu ditunga dijima!

⁴ Bantu babi mbatuadije buntomboji amu ku buana. Amu babalela, babanga kudinga bantu.

⁵ Badi ne lulengu bu lua nyoka wa luasa. Badi ne mapapa bu a nyoka wa moma

⁶ udi kayi uteleja muadi wa kashiba, nansha ka muimbi wa dilambu.

⁷ Mvidi Mukulu wanyi, ubapole menu. Maweja-Nangila, zaza bibanga bia ntambue ayi.

⁸ Bapueke ne mayi. Buume bu bisosa bidibu badiata.

⁹ Bafube bu dilandi didi dienda, diume! Kabamonyi diba, bu muana wa tshituka mufuile munda!

¹⁰ Nebabakose bu ntambua dishinda, kabidi nansha mutshikale mubishi nansha mosha mvunde neabatangalaje.

¹¹ Padi Mvidi Mukulu usombuela bantu babi aba, bantu bende nebasanke, badiate mu mashi a baluishi babu.

¹² Nanku bantu bonsu nebajadike ne: “Eyowa, tuamonyi mudi bantu ba Mvidi Mukulu bapeta difutu, mudi Mvidi Mukulu ukosa nsambu pa yoyi pa buloba.”