Misambu 54 - MUKANDA WA MYIDI MUKULU

Badi bakengesha muntu muakane

¹ Musambu wa mu mukanda wa mulombodi wa bena misambu. Wa kuimba ne nzenze. Kasala ka mu mukanda wa misambu ya Davide.

² Mmusake pavua bena Zife baya kuambila Shawule ne: Davide mmusokome muetu.

³ Mvidi Mukulu wanyi, umpandishe bua bantu banemeke dina diebe. Umbingishe, bualu udi ne bukole bua kuenza nanku.

⁴ Mvidi Mukulu wanyi, teleja mundi nkutendelela, teya matshi ku bindi ngamba.

⁵ Bantu bandi tshiyi mumanye, badi banduisha, bena tshinyangu badi basue kunshipa. Kabena batshina Mvidi Mukulu.

⁶ Kadi Mvidi Mukulu neangambuluishe, Maweja-Nangila neanduile mvita.

⁷ Mvidi Mukulu, upingajile baluishi banyi malu mabi avuabu bangenzele. Ubabutule bapuwe. Uleje muudi ukumbaja malaya ebe.

⁸ Maweja-Nangila, nentumbishe dina diebe, bualu udi mulenga, nenkulambule milambu ne muoyi wanyi mujima.

⁹ Udi munsungidile ku makenga anyi onsu. Ndi mumone mudi bena lukuna banyi babutuka.