Misambu 44 - MUKANDA WA MYIDI MUKULU

Mvidi Mukulu mmutubenge anyi?

1 Musambu wa mu mukanda wa mulombodi wa bena misambu. Kasala ka mu mukanda wa misambu wa bena Kora .

¹ Musambu wa mu mukanda wa mulombodi wa bena misambu. Kasala ka mu mukanda wa misambu wa bena Kora.

² Mvidi Mukulu wetu, tudi badiumvuile ne matshi etu, baledi betu ne bankambua bavua batuambile, malu manene auvua muenze ku kale mu tshikondu tshiabu.

³ Uvua mumuangeshe bantu ba bisamba bikuabu, bua kupa bantu bebe muaba wa kuasa. Uvua mukengeshe bisamba abi, bua bantu bebe bavulangane, basombe bimpe.

⁴ Bankambua betu kabavua bakuate ditunga adi, ku muele wabu wa mvita, nansha ku bukole bua diboku diabu, kadi amu ku diambuluisha diebe, ne ku bukole buebe. Uvua nabu diba dionsu, bualu uvua mubanange.

⁵ Wewe Mvidi Mukulu ke udi Mukalenga wanyi, udi uludika bantu bebe bua batshimune.

⁶ Ku bukole buebe, netuipate baluishi betu. Mu dina diebe netubaboze.

⁷ Tshiena ntekemena ku buta buanyi, nansha muele wanyi kawena ungambuluisha.

⁸ Kadi Wewe ke udi utusungidila ku baluishi betu, ufuisha badi batukina bundu.

⁹ Maweja-Nangila, matuku onsu tudi tukupa lumu. Tudi tutumbisha dina diebe kashidi.

¹⁰ Kadi mpindiewu, wewe kutubenga, kutufuisha bundu, baluishi betu kututshimuna. Kuena kabidi uya netu mu mvita.

¹¹ Ukadi utunyemesha kumpala kua bena lukuna betu. Ke baluishi betu kupawula bintu ne disanka.

¹² Udi utufila mu bianza biabu bu nyama ya kushipa. Bakadi batutangalaja mu matunga a bantu benyi.

¹³ Udi usumbisha bantu bebe ku mushinga mukese, kuyi nansha upeta makasa.

¹⁴ Udi utupendesha kudi bena mutumba, batulembakaja kudi batudi nabu pabuipi.

¹⁵ Udi muanyishe bua bantu ba bisamba bikuabu, batutele mu nsumuinu, benda bakupa mitu, batuseka.

¹⁶ Matuku onsu ndi mmona mudibu bampepeja. Ndi ne bundu mesu tente.

¹⁷ Bualu ndi ngunwua mudi bena lukuna batubunda, batuluisha batupenda.

¹⁸ Bionsu ebi bidi bituenzekela, katuyi nansha bakupua muoyi, katuyi nansha banyanga mikenji yebe.

¹⁹ Katuena nansha bakubenge, katuena bapambuke mu njila webe.

²⁰ Kadi udi mutuzaze, tukadi tuenda bu mibuabua mu dikolu. Wewe kutubuikila ne miidima mikole.

²¹ Bu tuetu bapue Mvidi Mukulu wetu muoyi, bu tuetu batendelela mvidie mikuabu,

²² kuvua mua kupanga kumanya bualu ebu to. Bualu Wewe udi ujingulula malu masokome onsu a munda mua muntu.

²³ Matuku onsu badi bakeba kutushipa, bualu tudi bantu bebe. Badi batutangila bu bana ba mikoku ba kuya kushipa.

²⁴ Maweja-Nangila, tabuluka! Udi utulengulula bua tshinyi? Bika ku tulu, kutulekedi kashidi to!

²⁵ Kuena musue kututangila kabidi bua tshinyi? Udi upua muoyi mudibu batukengesha, batulembakaja anyi?

²⁶ Bavua batubonde mu lupuishi, tuetu batue difu panshi.

²⁷ Utuluile mvita, utuambuluishe, utupikule, bualu tudi bamanye muudi utunanga.