Misambu 42 - MUKANDA WA MYIDI MUKULU

MUKANDA MUIBIDI (Misambu 42—72 ) Mvidi Mukulu wanyi, ndi nkujinga

1 Musambu wa mu mukanda wa mulombodi wa misambu. Kasala ka mu mukanda wa misambu wa bena Kora .

¹ Musambu wa mu mukanda wa mulombodi wa misambu. Kasala ka mu mukanda wa misambu wa bena Kora.

² Bu mudi ngulungu udila, ukeba mayi mimpe a musulu, ke mudi muoyi wanyi ukujinga wewe Mvidi Mukulu wanyi.

³ Muoyi wanyi udi ne nyota ya Mvidi Mukulu, ya Mvidi Mukulu wa muoyi. Ndiba kaayi dingabuela mu nzubu wa Mvidi Mukulu, bua kumueneka kumpala kuende, kumutendelela.

⁴ Butuku ne munya tshianyi tshiakudia ke binsonji. Badi bankonka matuku onsu ne: “Mvidi Mukulu webe udi penyi?”

⁵ Ndi mvuluka malu a kale, muoyi wanyi ungitshikila munda. Tuvua tuenda bantu tshisumbu, tuya mu nzubu wa Mvidi Mukulu bua tshibilu, tutumbisha Mvidi Mukulu, tumuela tunkunduluila.

⁶ Ndi mpita kubungama bua tshinyi? Muoyi wanyi udi upampakana bualu kaayi? Tekemena Mvidi Mukulu, bualu nemmutumbishe tshiakabidi. Yeye ke Mupandishi wanyi, ne Mvidi Mukulu wanyi!

⁷ Mvidi Mukulu wanyi, muoyi wanyi udi ne dibungama. Ke pandi nkutendelela, nansha meme musombe mutantshi mule ne nzubu webe, mu mikuna ya Ermone, pabuipi ne Mukuna-Muipi, ku mpokolu ya musulu wa Yardene.

⁸ Udi ungitshikijila mayi a muenji, mavuala enda avulangana, bipitshila bionsu pambidi panyi! Meme kudiina mu mayi ne kasuki!

⁹ Dituku dionsu Maweja-Nangila neangenzele bimpe. Butuku bujima nemmutumbishe, mmuele tuasakidila. Nentendelele Mvidi Mukulu, bualu kudiye ndi mpeta muoyi.

¹⁰ Nenkonke Mvidi Mukulu, lubuebue luanyi ne: “Udi mumpue muoyi bua tshinyi? Ndi nkenga, tshiyi ne dikisha, bualu kaayi? Mudi baluishi banyi bankengesha nenku mbishi?”

¹¹ Bipendu bia baluishi banyi bidi binsunsula, bualu dituku dionsu badi banseka, bangebeja ne: “Mvidi Mukulu webe udi penyi?”

¹² Ndi mpita kubungama bua tshinyi? Muoyi wanyi udi upampakana bualu kaayi? Tekemena Mvidi Mukulu, nemmutumbishe tshiakabidi! Yeye ke Mupandishi wanyi ne Mvidi Mukulu wanyi!