Misambu 41 - MUKANDA WA MYIDI MUKULU

Mubedi udi utendelela

¹ Musambu wa mu mukanda wa mulombodi wabena misambu. Wamu mukanda wa misambu ya Davide.

² Muntu udi uvuluka mupele ne muena dikenga mmuena diakalenga! Maweja-Nangila neamuambuluishe diba didi dikenga dimukuata.

³ Maweja-Nangila neamulame ne muoyi, amuendeshe diakalenga pa buloba, kayi umulekela mu bianza bia baluishi bende.

⁴ Padiye mu bulalu, usama bikole, Maweja-Nangila udi umukuba, umupingajila bukole.

⁵ Bu mundi ntekemena nanku, ndi ngambila Maweja-Nangila ne: “Ndi muena tshibawu ku mesu ebe, kadi umfuile luse, umpingajile bukole ne makanda.”

⁶ Baluishi banyi badi bankebela diakabi, bamba ne: “Kantu aka nekafue diba kaayi, bua bakapue muoyi kashidi?”

⁷ Padi muluishi unkumbula, kena unsamba ne muoyi muimpe to. Udi unsekesha, kadi mundamunda ukeba kudiwula mundi muena tshibawu, upatuka amu pambelu, utuadija kunjana.

⁸ Badi bankina, badi badikungija, bantela, banungana, banjingila lufu, bamba ne:

⁹ “Wawa ukadi mikolu ku tshiina! Bua kumukaye pa bulalu, amu yeye mufue!”

¹⁰ Mulunda wanyi wa pa muoyi, utuvua tudia nende, tuambilangana nende malu onsu patoke, ukadi unduisha!

¹¹ Kadi wewe Maweja-Nangila, umfuile luse, umpingajile bukole, bua mmone mua kudisombuela, kubanyoka.

¹² Pikala muluishi wanyi katshiyi udikokola pa tshiadi, nenjadike bushuwa ne: udi munnange!

¹³ Bu mundi tshiyi ne bualu, neutue ku tshianyi, newanyishe bua meme kushala pabuipi nebe kashidi.

¹⁴ Tumbishayi Maweja-Nangila, Mvidi Mukulu wa Izrayele. Numutumibishe kashidi tshiendelele! Amene, eyo, bikale nanku!