Misambu 40 - MUKANDA WA MYIDI MUKULU

Bonsu mbamanye biudi mungenzele

¹ Musambu wa mu mukanda wa mulombodi wa bena misambu. Wa mu mukanda wa misambu ya Davide.

² Mvua mutekemene bikole kudi Maweja-Nangila. Kuinamaye kundi, kumvuaye lubila luanyi.

³ Kumpatulaye mu dijimba dia lufu, mu bitotshi bia lunteke. Kungimanyikaye makasa madiata pa lubuebue, unkolesha mu mikolu.

⁴ Kundongeshaye musambu mupiamupia, musambu wa dimutumbisha yeye, Mvidi Mukulu wetu. Ba bungi nebaumvue, batekemena kudiye. Nebajadike mudi Maweja-Nangila ne bumfumu.

⁵ Muntu udi utekemena kudi Maweja-Nangila, kayi ubuelakana ne benji ba bibi, nansha ne bena dishima, mmuena diakalenga.

⁶ Maweja-Nangila, Mvidi Mukulu wetu, kakuena udi mukufuane. Bishima biudi mutuenzele mbivule, bilenga biudi musue kutusankisha nabi mbipite bungi. Tshiena mua kubilonda nansha kubibala.

⁷ Milambu ya nyama nansha ya biakudia kayena ikulengelela. Milambu ya kuosha nansha ya kudikobolola, kuena uyilomba. Kadi udi munjibule matshi, bua meme kukuteleja.

⁸ Ke pandi ngamba ne: “Ke meme ewu, mfika, bua kukumbaja tshidibu bafunda mu mukanda wa Mikenji.”

⁹ Mvidi Mukulu wanyi, ndi musue kukumbaja biudi ujinga. Ndi mulame mikenji yebe mu muoyi wanyi.

¹⁰ Bantu bebe bamane kusangila, nembamanyishe ne: Maweja-Nangila ke udi upandishangana. Maweja-Nangila udi mumanye mundi tshiyi mua kupuwa.

¹¹ Tshiena nsokoka bantu muudi mumpandishe. Kadi ndi mbajadikila ne: Wewe ke musungidi udi ukumbaja biudi mulaye. Miaba yonsu idi bantu basangila, nebamanyishe muudi ne muoyi muimpe, kabidi ne diyi dimue.

¹² Maweja-Nangila kuakubenga kumfuila luse to. Bu muudi munnange, ukumbaje kabidi malaya ebe, neumpandishe misangu yonsu.

¹³ Makenga mmankuate nseke yonsu, tshiena mua kuabala. Adi afuma ku bilema bianyi, bindi mmona bidi amu biobi. Bidi bipite nsuki yanyi bungi, ke padi muoyi wanyi munshikile munda.

¹⁴ Maweja-Nangila, umpandishe. Maweja-Nangila, kolesha ungambuluishe.

¹⁵ Badi basue kunshipa, bafue bundu, bapange tshia kuenza. Badi basanka bua dikenga dianyi, lumu lubupuke.

¹⁶ Badi banseka, bapuwe, bundu bubakuate.

¹⁷ Kadi bantu bebe bonsu basanke bikole bualu buebe. Badi bakunanga wewe, Mupandishi, bakutumbishe matuku onsu, bamba ne: “Maweja-Nangila mmunene!”

¹⁸ Meme ndi mupele ne muena dikenga, kadi Maweja-Nangila udi munnange. Udi ungambuluisha, undama, ngwewe! Mvidi Mukulu wanyi, fika lukasa.