Misambu 4 - MUKANDA WA MYIDI MUKULU

Mvidi Mukulu udi undumbuluila

¹ Musambu wa mu mukanda wa mulombodi wa misambu. Musambu wa mu mukanda wa misambu ya Davide, wa kuimba ne nzenze.

² Mvidi Mukulu, mumbingishi wanyi, pandi nkubikila bua kungambuluisha, ungitabe. Pavua bantu bankengesha, wewe uvua unsungidila. Anyisha, uteleje dikulomba dianyi.

³ Nuenu aba nenunyange lumu luanyi too ne ku diba kaayi? Nudi nunanga kunshiminyina malu patupu. Nudi nukeba kunjana bua tshinyi?

⁴ Numanye ne: Maweja-Nangila mmusungule muntu udi umulamata. Pandi mmubikila, udi unteleja.

⁵ Mutshinayi! Kanuenji kabidi malu mabi. Nudikonkonone panudi balale. Nushale talalaa.

⁶ Lambulayi milambu idi minufundila bua kufila. Nutekemene kudi Maweja-Nangila.

⁷ Bantu ba bungi badi badiabakena, bamba ne: “Watumuenesha diakalenga nnganyi? Bualu Maweja-Nangila kena ututangila kabidi ne muoyi muimpe!”

⁸ Kadi meme, Maweja-Nangila mmumpeshe disanka, dipite dia bantu badi banowa ntete ya kuenza bukula, nansha badi bapola tumuma tua kukama maluvu.

⁹ Pandi nya kulala, ndi mpeta tulu musangu umue, bualu wewe nkayebe, Maweja-Nangila, udi undama mu bupole.