Misambu 36 - MUKANDA WA MYIDI MUKULU

Maweja-Nangila, ndi mpetela muoyi kuudi

¹ Musambu wa mu mukanda wamisambu ya muntu wa Mvidi Mukulu Davide, wa mu mukanda wa mulombodi wa misambu.

² Ndi muvuluke miaku idi ntomboji wakula, wamba ne: “Tutshine Mvidi Mukulu bua tshinyi?

³ Udi uditemba ne: ndi muntu muakane. Ke mudiye kayi mua kutonda bubi buvuaye muenze, nansha kububenga.

⁴ Bionsu bidiye wamba bidi amu bia dishima ne bia didinga. Mmupange meji, mmupange muoyi muimpe.

⁵ Butuku udi udilongolola bua kuenza bibi. Udi wenda mu njila wa bubi, kayi musue kudilengeja.

⁶ Maweja-Nangila, bulenga buebe mbutue ne mu diulu. Biudi wamba, udi ubikumbaja ne mu mavuba.

⁷ Lupandu luebe ndupite ne mikuna mitumbuke ku bule. Nsambu iudi ukosa mmipite buondoke bua mayi manene. Maweja-Nangila, wewe udi wambuluisha bantu, wambuluisha kabidi ne nyama.

⁸ Mvidi Mukulu wanyi, wewe udi utunanga bikole; ke patudi tusokomena mu mapuapua ebe.

⁹ Udi utudisha ne bilenga bia mu nzubu muebe, tuukuta, utunuisha ku misulu ya dinanga diebe.

¹⁰ Kuudi ndi mpetela bukole. Wewe udi diba didi ditumuenesha muoyi.

¹¹ Unange badi bakumanya. Bantu badi bakuitaba, ubenzele bimpe.

¹² Dikasa dia muena ditambisha kadinzaaji. Tshianza tshia bantu babi katshimpatudi mu nzubu.

¹³ Benji ba bibi badi bapona panshi kumpala kuebe, kabayi mua kujuka kabidi to.