Misambu 34 - MUKANDA WA MYIDI MUKULU

Maweja-Nangila mmumpandishe

1 Musambu wa mu mukanda wa misambu ya Davide muimbe pavuaye mudienze bu mupale kumpala kua Abimeleke, Abimeleke kumuipata mu

¹ Musambu wa mu mukanda wa misambu ya Davide muimbe pavuaye mudienze bu mupale kumpala kua Abimeleke, Abimeleke kumuipata mu lubanza luende lua bukalenga.

² Nengele Maweja-Nangila tuasakidila diba dionsu, nemmusamune matuku onsu.

³ Nentumbishe Maweja-Nangila bua bivuaye muenze. Badibu bakengesha nebanteleje, basanke.

⁴ Tukobuelayi bonsu Maweja-Nangila. Tutumbishe tshiapamue lumu luende.

⁵ Mvua ntendelela Maweja-Nangila, kungitabaye. Kumpandishaye ku bionsu bivua binkuatshisha bowa.

⁶ Mutangilayi, nanku nenusanke. Kanuakufua bundu, kanuakunyenga mpala.

⁷ Maweja-Nangila udi uteleja mupela udi umuela mbila, ujikija dikenga diende dionsu.

⁸ Mutumibue udi ulama bantu ba Maweja-Nangila, ubumusha ku njiwu yonsu.

⁹ Tetayi numvue mudi busheme bua Maweja-Nangila. Badi banyemena kudiye mbena diakalenga.

¹⁰ Nuenu bantu ba Maweja-Nangila, nuitabe bumfumu buende. Badi bamutumikila, kabakukenga kantu.

¹¹ Baneme kabena pa kusokoma, bua tshiyole ne bua nzala. Kadi badi batekemena Maweja-Nangila, nebapete bionsu bidibu bakengela.

¹² Vuakunuayi bana banyi, nunteleje, nennulongeshe mua kunemeka Maweja-Nangila.

¹³ Padi muntu musue kusanka panu, kupeta diakalenga matuku mavule,

¹⁴ alekele kujanangana, alekele kushimangana,

¹⁵ epuke bubi, enze bimpe, asuminyine ne dikeba bupole mu bantu.

¹⁶ Maweja-Nangila udi utangila bantu bende, uteleja padibu bamubila.

¹⁷ Maweja-Nangila udi ukina benji ba bibi, ukupula mena abu pa buloba.

¹⁸ Padi bantu bende bamutendelela, Maweja-Nangila udi ubateleja, ubumusha ku makenga abu.

¹⁹ Udi pabuipi ne badi ne kanyinganyinga, upandisha badi kabatshiyi ne ditekemena.

²⁰ Udi munange Mvidi Mukulu udi ne makenga mavule, kadi Maweja-Nangila udi umupandisha ku onsu

²¹ Udi ulama mubidi wabu mujima, bua kabatshibudi mufuba wabu nansha umue.

²² Muena bubi, bubi buende nebumushipe. Nebanyoke badi bakina bantu bakane.

²³ Maweja-Nangila udi upandisha bantu bende. Badi banyemena kudiye, kabakupeta tshibawu.