Misambu 30 - MUKANDA WA MYIDI MUKULU

Maweja-Nangila, wewe udi mumfululule

¹ Musambu wa mu mukanda wa misambu ya Davide, wa kuimba dituku didibu bajidila nzubu wa Mvidi Mukulu.

² Maweja-Nangila, ndi nkutumbisha, bualu uvua mumpandishe, kuvua muanyishe bua baluishi banyi banseke.

³ Maweja-Nangila, Mvidi Mukulu wanyi, mvua munsengelele, wewe kumpandisha.

⁴ Wewe kumpatula mu kandondu ka bafue. Nkavua dikasa ku tshiina, wewe Maweja-Nangila kumfululula.

⁵ Nuenu bantu ba Maweja-Nangila, mutumbishayi ne misambu, numusamune, mwuluke mudiye wa tshijila.

⁶ Tshiji tshiende tshidi katupa, kadi udi utuenzela bimpe matuku onsu. Dilolu tutshidi tudila muadi, dinda tukadi tuseka.

⁷ Mvua musombe talalaa, ngela meji ne: “Kakuena bualu bubi budi mua kungenzekela.

⁸ Bu muudi wewe Maweja-Nangila munnange, ndi nsomba mushindame bu udi pa mukuna.” Kadi wewe kungela nyima, meme kubuela mu dikenga.

⁹ Maweja-Nangila, ndi nkusengelela, nkulomba bua ungambuluishe.

¹⁰ Meme mufue, banjike, neupete tshinyi? Muntu mumane kushala lupuishi, udi mua kukusamuna, nansha kuambila bantu muudi ukumbaja malaya anyi?

¹¹ Maweja-Nangila, teleja, umfuile luse. Maweja-Nangila, ungambuluishe.

¹² Uvua wandamuna kanyinganyinga kanyi, kenza tshianga tshia disanka. Uvua mumvule tshilamba tshia madilu, mumvuadike tshia tshibilu.

¹³ Maweja-Nangila, Mvidi Mukulu wanyi, nenkutumbishe amu kukutumbisha. Nenkuele tuasakidila matuku anyi onsu.