Misambu 3 - MUKANDA WA MYIDI MUKULU

Ndi munkatshi mua baluishi

1 Musambu wa mu mukanda wa misambu ya Davide, uvuaye musake pawaye unyema muanende Absalome .

¹ Musambu wa mu mukanda wa misambu ya Davide, uvuaye musake pawaye unyema muanende Absalome.

² Maweja-Nangila, baluishi banyi badi ba bungi. Bantu badi bankina, kabena kubala.

³ Bantu ba bungi badi bangamba ne: “Mvidi Mukulu kena mua kumuambuluisha nansha kakese!”

⁴ Kadi wewe, Maweja-Nangila, udi unjika bu ngabu. Udi umpa lumu, ndiumvua ne bukole.

⁵ Pandi mbikila Maweja-Nangila bua kungambuluisha, udi ungumvuila ku mukuna wende wa tshijila, ungandamuna.

⁶ Butuku ndi ndala amu bilenga, bualu udi undama too ne mundi mbika dinda.

⁷ Nansha bantu binunu ne binunu banyungulula nseke yonsu, kabena mua kunkuatshisha bowa.

⁸ Maweja-Nangila, juka, Mvidi Mukulu wanyi, unsungidile. Wewe ke udi ututa baluishi banyi ku mbanga, upola menu a bantu babi.

⁹ Maweja-Nangila, wewe udi mua kusungidila bantu. Wele bantu bebe lupemba!