Misambu 29 - MUKANDA WA MYIDI MUKULU

Maweja-Nangila udi wakula

1 Musambu wa mu mukanda wa misambu ya Davide.

¹ Musambu wa mu mukanda wa misambu ya Davide. Nuenu bonsu badi mu diulu, vuayi, nutumbishe Maweja-Nangila, vuayi, nusamune lumu luende, mwuluke bukole buende.

² Vuayi, nusamune lumu lua Maweja-Nangila. Padiye uleja mudiye wa tshijila, nuiname panshi kumpala kuende.

³ Mvidi Mukulu wa lumu udi ukungula. Diyi dia Maweja-Nangila didi diumvuika pa mayi. Maweja-Nangila udi uleja pa mayi manene, mudiye ne bumfumu.

⁴ Maweja-Nangila udi wela diyi ne bukole, Maweja-Nangila udi wela diyi ne butumbi.

⁵ Diyi dia Maweja-Nangila didi ditshibula mitshi ya sedre, ditshibula ne mitshi minene ya sedre ya mu Lebanone.

⁶ Maweja-Nangila udi ujija mikuna ya mu Lebanone, itupika bu tulume tua ngombe, ujija mukuna wa Ermone, utupika bu kana ka mbowa.

⁷ Diyi dia Maweja-Nangila didi dipenya bu muela wa mvula.

⁸ Diyi dia Maweja-Nangila didi dizakaja tshipela, Maweja-Nangila udi unyukisha tshipela tshia mu Kadeshe.

⁹ Diyi dia Maweja-Nangila didi dilelesha ngulungu, dilelesha mbudi muitu. Mu nzubu mua Maweja-Nangila, bantu bonsu badi bela mbila ne: “Tutumbishayi Mvidi Mukulu!”

¹⁰ Maweja-Nangila udi uleja pa mayi manene mudiye mfumu, mudi bukalenga buende bua kashidi.

¹¹ Maweja-Nangila apeshe bantu bende bukole, abele lupemba, abasombeshe mu bupole.