Misambu 27 - MUKANDA WA MYIDI MUKULU

Kudi Maweja-Nangila, ndi nsomba talalaa

1 Musambu wa mu mukanda wa misambu ya Davide.

¹ Musambu wa mu mukanda wa misambu ya Davide. Maweja-Nangila udi bukole buanyi, kabidi mumpandishi wanyi, tshiena mua kuzakela muntu to. Maweja-Nangila udi undama, tshiena ntshina muntu.

² Padi bantu babi banduisha, bakeba kunshipa, amu bobu ke badi batetuka, badishinda panshi.

³ Nansha tshituilu tshijima tshingela munkatshi, tshiena ngumvua bowa. Nansha babanga mvita, ndi nsomba amu talalaa.

⁴ Tshimue tshindi njinga menemene, ndomba kudi Maweja-Nangila, se nkusomba mu nzubu wende matuku anyi onsu, nkutumbisha bilenga bidiye mungenzele, nkumanya tshidiye musue.

⁵ Nanku diba dia dikenga, neambueje mu nzubu muende, neanteke kaba kakole pa mukuna udiye usomba.

⁶ Diakamue nkadi mpetula baluishi badi bangela munkatshi. Nendambule Maweja-Nangila milambu, mmuela tunkunduluila, mmuimbila misambu.

⁷ Maweja-Nangila, pandi nkubikila, unteleje, umfuile luse, ungitabe.

⁸ Ndi mvuluka miaku yebe ya ne: “Pingana kundi.” Ke pandi mpingana kuudi wewe, Maweja-Nangila.

⁹ Kunsokomi, kungipatshi ne tshiji. Wewe ke udi mungambuluishe misangu yonsu. Nanku lelu Wewe Mvidi Mukulu, mumpandishi, kumbengi, kundekedi.

¹⁰ Nansha tatu ne mamu bandekela, wewe, Maweja-Nangila, neungakidile.

¹¹ Maweja-Nangila, undeje njila udi muakane, ungendeshe mu njila udi kayi njiwu, bualu baluishi banyi mbavule.

¹² Kumfidi mu bianza bia bena tshikisu, bualu bena dishima badi bamfunda, bakeba kunkuatshisha bowa.

¹³ Meme tshiyi mujadike ne: Maweja-Nangila mmunange, mungasomba bimpe mu buloba ebu mbishi?

¹⁴ — Tekemena Maweja-Nangila, kola muoyi, kutekeshi mu maboku, eyowa, tekemena Maweja-Nangila!