Misambu 24 - MUKANDA WA MYIDI MUKULU

Maweja-Nangila udi ubuela mu nzubu wende

1 Musambu wa mu mukanda wa misambu ya Davide.

¹ Musambu wa mu mukanda wa misambu ya Davide. Bantu ne bintu bionsu mbia Maweja-Nangila, buloba ne bidipu bionsu mbiende yeye.

² Yeye ngudi mushindike buloba pa mayi manene, bua mavuala kaabunyungishi.

³ — Nnganyi udi mua kubanda pa mukuna wa Maweja-Nangila? Nnganyi udi mua kubuela mu nzubu wende wa tshijila?

⁴ — Ke bena ku muela kakuyi mashi, ba muoyi mutoke, kabayi bela meji mabi, kabayi baditshipa mitshipu ya dishima.

⁵ Maweja-Nangila neabele lupemba. Mvidi Mukulu mupandishi wabu, neababingishe.

⁶ Ke bantu badi bakeba Maweja-Nangila, basemena kudi Mvidi Mukulu wa Yakobe.

⁷ Biibi, unzulukayi, shiyayi muaba munene! Kangulayi ne biibi bia kale! Mukalenga munene ukadi ufika!

⁸ — Mukalenga munene ewu nnganyi? — Ke Maweja-Nangila, tshilobu tshia makanda; Maweja-Nangila, tshilobu, kanyemi baluishi!

⁹ Biibi unzulukayi, shiyayi muaba munene! Kangulayi ne biibi bia kale! Mukalenga munene ukadi ufika!

¹⁰ — Mukalenga munene ewu nnganyi? — Mukalenga munene ewu ke Maweja-Nangila, mfumu wa buloba ne wa bionsu bidipu!