Misambu 148 - MUKANDA WA MYIDI MUKULU

Tumbishayi Mvidi Mukulu mu diulu ne pa buloba

¹ Tumbishayi Maweja-Nangila, Aleluya! Tumbishayi Maweja-Nangila, nuenu badi mu diulu, mutumbishayi nuenu bonsu badi mulu.

² Batumibue bonsu ba Mvidi Mukulu, bamutumbishe. Biluilu biende bionsu, mutumbishayi.

³ Diba ne ngondu, numutumbishe. Mitotu yonsu idi ikenka, numutumbishe.

⁴ Tshibuashibuashi tshia mulu, nuenu kabidi mayi adi madiunguije mulu, numutumbishe.

⁵ Bintu bionsu bitumbishe Maweja-Nangila, bualu wakabitumina diyi, biobi kuenzeka.

⁶ Kubitekaye mu miaba yabi kashidi, kubielela mikenji idi kayiyi mua kukupula.

⁷ Nuenu bonsu badi pa buloba, nuenu mayi manene ne bidika bidimu, numutumbishe,

⁸ nuenu kabidi kapia ne mabue a mvula, neje ne dibungi, tshipepele tshidi tshitumikila diyi diende, numutumbishe.

⁹ Nuenu mikuna minene ne mikese, mitshi ya bimuma ne mitshi yonsu ya sedre, numutumbishe,

¹⁰ nyama ya mu ditu ne ya pambelu, nyunyi ya mulu ne bilandadi, numutumbishe.

¹¹ Nuenu bakalenga ba pa buloba ne bantu bonsu, bana ba bamfumu ne balombodi ba buloba, numutumbishe.

¹² Nuenu bana ba balume ne ba bakaji, bansongalume ne bakulumpe, numutumbishe.

¹³ Tumbishayi Maweja-Nangila, bualu yeye nkayende ke udi ne dina dia lumu. Udi ne buneme pa buloba ne mu diulu.

¹⁴ Kupeshaye tshisa tshiende lumu, kutshizangika. Kutumbishaye bantu badi bamulamata, kutumbisha tshisa tshiende tshijima tshia bena Izrayele. Tumbishayi Maweja-Nangila, Aleluya!