Misambu 147 - MUKANDA WA MYIDI MUKULU

Mvidi Mukulu udi mfumu wa bintu bionsu ne wa malu onsu

¹ Tumbishayi Maweja-Nangila, Aleluya! Mbimpe kuimbila Mvidi Mukulu wetu misambu, bidi biakane kumutumbisha bu mudiye musue!

² Maweja-Nangila mmuibake Yerushalayime, mmusangishe bena Izrayele bavua mu bupika.

³ Udi usamba bantu badi ne dibungama mu muoyi, ubondapa padibu batapika.

⁴ Yeye kabidi ke udi ubala mitotu bungi buayi, uyinyika yonsu mena.

⁵ Maweja-Nangila wetu mmunene. Udi ne bukole buonsu, lungenyi luende kaluena kuamba.

⁶ Maweja-Nangila udi ubandisha bapuekele, kadi upuekesha bantu babi too ne mu buloba.

⁷ Imbilayi Maweja-Nangila misambu numuele tuasakidila, nuimbile Mvidi Mukulu wetu lunzenze.

⁸ Yeye ke udi ubuikila diulu ne mavuba, ulokesha mvula pa buloba, umenesha bisosa pa mikuna.

⁹ Udi udisha nyama ne bana ba tshikololu, padibi bikeba tshiakudia.

¹⁰ Dikanda dia nyama wa kabalu kena nadi bualu, nansha bukole bua muntu kabuena bumusankisha,

¹¹ udi muanyishe bantu badi bamumanya bu Mvidi Mukulu wabu, batekemena bulenga buende.

¹² Yerushalayime, ela Maweja-Nangila mbila ya disanka. Siyone, tumbisha Mvidi Mukulu webe,

¹³ bualu udi mukulame, wenzela bana ba mu nzubu muebe bonsu bimpe.

¹⁴ Maweja-Nangila udi ubueja bupole mu buloba buebe, ukupesha ntete ya kuenza bukula mimpe ya bungi.

¹⁵ Udi utuma mikenji yende pa buloba, diyi diende difika lukasa.

¹⁶ Udi ulokesha neje bu busu bua ndanda. Umuangalaja lumuma lukuatakane bu butu.

¹⁷ Udi unyaka tubue tua mashika, kakuyi muntu ukolela mashika adiye utuma.

¹⁸ Padiye utumina tubue tua mashika etu diyi, tudi tuenguluka, yeye mutume lupepele, mayi adi apueka.

¹⁹ Udi umanyisha tshisa tshiende diyi diende, ufundila Izrayele mikenji ya muoyi.

²⁰ Kena muenzele tshisa tshikuabu nansha tshimue nanku, tshisa nansha tshimue katshiena tshimanya meyi ende. Tumbishayi Maweja-Nangila, Aleluya!