Misambu 146 - MUKANDA WA MYIDI MUKULU

Maweja-Nangila udi ukuba bantu badi kabayi ne bukole

¹ Tumbishayi Maweja-Nangila, Aleluya! Muoyi wanyi tumbisha Maweja-Nangila!

² Nentumbishe Mvidi Mukulu wanyi matuku onsu antshidi ne muoyi, nemmuimbile misambu bidimu bionsu bindi panu.

³ Kanutekemenyi baneme: bualu amu mbantu. Kabena mua kunupandisha.

⁴ Padibu bafua, badi babajika, malu avuabu bapangadika mua kuenza adi ajimina bu bobu.

⁵ Muntu udi Mvidi Mukulu wa Yakobe wambuluisha, mutekemene kudi Maweja-Nangila Mvidi Mukulu wende, mmuena diakalenga!

⁶ Tekemena kudi Maweja-Nangila matuku onsu. Yeye ke udi muenze diulu ne buloba, mayi manene ne bintu bionsu bidimu.

⁷ Udi ulumbuluila bantu badibu bakengesha, upesha badi ne nzala tshiakudia, usulula badi mu nkanu.

⁸ Maweja-Nangila udi utabaja mpofu, ubandulula badi biname, munange badi bamulamata.

⁹ Maweja-Nangila udi ulama bantu badibu bipata, wambuluisha muana nshiya ne mukaji mukamba, kadi udi unyanga malu adi bantu babi bapangadika mua kuenza.

¹⁰ Siyone, Maweja-Nangila mmukalenga kashidi. Yeye ke Mvidi Mukulu webe bidimu ne bidimu. Tumbishayi Maweja-Nangila, Aleluya!