Misambu 145 - MUKANDA WA MYIDI MUKULU

Maweja-Nangila, bukalenga buebe mbua kashidi

1 Musambu wamu mukanda wa misambu ya

¹ Musambu wamu mukanda wa misambu ya Davide, bua kutumbisha nawu Mvidi Mukulu. Mvidi Mukulu wanyi, wewe udi Mukalenga, nemmanyishe bantu buneme buebe, nenkuele tuasakidila kashidi.

² Nenkuele tuasakidila matuku onsu, nkutumbishe kashidi.

³ Wewe Maweja-Nangila udi munene, ne bantu bonsu nebakutumbishe, bualu buneme buebe kabuena ndekelu.

⁴ Ndelanganyi yonsu imanyishangane biudi muenze, yambilangane bukole buebe.

⁵ Nengambile bantu bumfumu buebe, lumu luebe ne butumbi buebe, nembalondele malu a dikema audi muenze.

⁶ Bantu bambilangane bua bukole buebe budi bukuata bowa! Kadi meme nemmanyishe malu manene audi muenze.

⁷ Bonsu bavuluke bulenga buebe kabuyi kuamba, batumbishe ne disanka bua paudi ukumbaja malaya ebe!

⁸ Maweja-Nangila udi muimpe ne luse. Kuena ufika munda lukasa. Bulenga buebe kabuena kuamba.

⁹ Maweja-Nangila udi musue bantu bonsu, udi munange bonsu badiye mufuke.

¹⁰ Maweja-Nangila, bantu bonsu bakutumbishe! Badi bakulamata bakuele tuasakidila!

¹¹ Batumbishe bukalenga buebe! Bambilangane bukole buebe!

¹² Nanku nebamanyishe bukua bantu bukole buebe, ne bukalenga buebe bua lumu.

¹³ Maweja-Nangila, bukalenga buebe mbua kashidi. Bumfumu buebe nebushale mu bidimu bionsu. Udi ukumbaja malaya ebe. Udi ne muoyi muimpe mu malu onsu audi muenze.

¹⁴ Udi wimanyika bantu bonsu badi badishinda, ukankamika bonsu badi batekete.

¹⁵ Bonsu mbakutangile wewe Maweja-Nangila, batekemena bua ubapeshe tshiakudia diba didibu batshikengela.

¹⁶ Wewe ke udi upesha muntu yonsu tshintu, ujikija dikenga diende

¹⁷ Buakane bua Maweja-Nangila budi bumueneka, mu malu onsu adiye wenza. Bulenga buende budi budileja mu midimu yende yonsu.

¹⁸ Maweja-Nangila udi pabuipi ne bantu badi bamubila, udi pabuipi ne bonsu badi bamubila ne muoyi umue.

¹⁹ Udi witaba malomba a badi bamulamate, ubasungidila padiye umvua bamubila.

²⁰ Maweja-Nangila udi ukuba bonsu badi bamunanga, kadi ubutula bantu babi bonsu.

²¹ Mukana muanyi mutumbishe Maweja-Nangila ne misambu! Bionsu bidi ne muoyi biele Mvidi Mukulu wa tshijila tuasakidila bua kashidi!