Misambu 144 - MUKANDA WA MYIDI MUKULU

Mukalenga udi utendelela

1 Musambu wa mu mukanda wa misambu ya Davide.

¹ Musambu wa mu mukanda wa misambu ya Davide. Ndi ngela Maweja-Nangila, Lubuebue luanyi tuasakidila, yeye ngudi undongesha mua kuluangana mvita.

² Yeye ke ditekemena dianyi ne tshisokomenu tshianyi, muaba wanyi mukole undi nsokomena, ne ngabu wanyi wa lupandu. Yeye ngudi untekeshila bisamba bia bantu.

³ Maweja-Nangila, muntu mene nnganyi bua wewe kumutangila? Muntu mene nnganyi bua wewe kumuvuluka?

⁴ Muntu udi amu bu lupepela, matuku ende a panu adi bu mundidimbi udi ujimina.

⁵ Maweja-Nangila, puekesha diulu diebe, utuluke; osha mikuna ne lusongu lua munu webe.

⁶ Penya miaba yonsu bu miele ya mvula, tuma mikete yebe miaba yonsu.

⁷ Oluela tshianza tshiebe mu diulu, umpandishe, unsungidile ku njiwu, ku bianza bia bantu ba bisamba bikuabu,

⁸ badi ne dishima mukana, buupula ne bianza biabu mutshipu udibu baditshipa.

⁹ Mvidi Mukulu wanyi, ndi musue kukuimbila musambu mupiamupia, ndi nkusamuna ne lunzenze lua nshinga dikumi:

¹⁰ “Wewe ngudi wambuluisha bakalenga, ngudi upandisha muena mudimu webe Davide.”

¹¹ Umpandishe ku muele wa lufu unsungidile kudi bantu ba bisamba bikuabu, badi ne dishima mukana, buupula ne bianza biabu mutshipu udibu baditshipa.

¹² Bana betu ba balume bikale bu mitshi idi ikola biakane biangatshile ku buana buayi! Bana betu ba bakaji bikale ba mpala mimpe, bu mudi makunji mazola adibu balengeja nawu nzubu ya bakalenga!

¹³ Mayeba etu uwule ne bintu bia mishindu yonsu! Mikoku yetu mu mpata, ivulangane misangu tshinunu, nansha misangu binunu dikumi!

¹⁴ Ngombe yetu itante! Mvita, tshimuangi ne mbila mikole mu misesu, biyile kule!

¹⁵ Tshisa tshidi ne bintu ebi, tshikale ne disanka! Tshisa tshidi tshitangila Maweja-Nangila bu Mvidi Mukulu watshi, tshikale ne disanka!