Misambu 14 - MUKANDA WA MYIDI MUKULU

Bubi bua bantu

Musambu wa mu mukanda wa misambu ya Davide, wa mu mukanda wa mulombodi wa bena misambu.

¹ Bantu batshimbakane badi badiakuila ne: Mvidi Mukulu kenaku to. Bantu aba mbantu babi, badi benza malu mabi mapite. Nansha umue kena wenza tshidi Mvidi Mukulu musue.

² Maweja-Nangila udi mu diulu, muinangile panshi bua kukenketa bantu, kumona ne kudi umue wa meji, udi umutendelela!

³ Kadi bonsu mbapambuke, bonsu mbena buenzayi, kakuena udi wenza tshidi Mvidi Mukulu musue.

⁴ Maweja-Nangila udi wamba ne: “Bonsu badi bakengeshangana aba, kabena bumvue bualu nansha bumue. Badi badia bantu banyi bu mampa, babenga kuntendelela.”

⁵ Kadi diakamue nebakuatshike bowa, bualu Maweja-Nangila neafike bua kuambuluisha bende.

⁶ “Nuvua bapangishe bapele tshivuabu batekemene. Kadi Maweja-Nangila ke udi ubalama.”

⁷ Wafuma ku Siyone bua kupandisha Izrayele nnganyi? Maweja-Nangila neapatule bantu bende mu bupika. Diba adi ndelanganyi ya Yakobe neisanke, bena Izrayele nebatue tshianga.