Misambu 136 - MUKANDA WA MYIDI MUKULU

Elayi Mupandishi wa Izrayele tuasakidila

¹ Tumbishayi Maweja-Nangila, bualu mmulenga, dinanga diende ndia kashidi

² Tumbishayi Mvidi Mukulu mutambe bunene, bualu dinanga diende ndia kashidi.

³ Tumbishayi Maweja-Nangila mutambe bunene, bualu dinanga diende ndia kashidi.

⁴ Yeye nkayende mmuenze malu manene a dikema, bualu dinanga diende ndia kashidi.

⁵ Kuenzaye diulu ne meji, bualu dinanga diende ndia kashidi.

⁶ Kujadikaye buloba pa mayi manene, bualu dinanga diende ndia kashidi.

⁷ Kuenzaye mabulunge manene; bualu dinanga diende ndia kashidi,

⁸ diba bua kuludika munya, bualu dinanga diende ndia kashidi,

⁹ mitotu ne ngondu bua kuludika butuku, bualu dinanga diende ndia kashidi.

¹⁰ Kushipaye banabute ba bena Ejipitu, bualu dinanga diende ndia kashidi.

¹¹ Kupatulaye tshisa tshiende tshia Izrayele mu Ejipitu, bualu dinanga diende ndia kashidi.

¹² Kulejaye bukole buende, bualu dinanga diende ndia kashidi.

¹³ Kukosaye mayi manene bitupa bibidi, bualu dinanga diende ndia kashidi,

¹⁴ bua kupitshishilamu tshisa tshia Izrayele, bualu dinanga diende ndia kashidi,

¹⁵ kadi kuinamu tshiluilu tshia mfumu wa bena Ejipitu, bualu dinanga diende ndia kashidi.

¹⁶ Kulombolaye tshisa tshiende mu tshipela, bualu dinanga diende ndia kashidi.

¹⁷ Kushipaye bakalenga banene, bualu dinanga diende ndia kashidi,

¹⁸ kushipaye bakalenga ba lumu, bualu dinanga diende ndia kashidi:

¹⁹ nSikone, mukalenga wa bena Amore, bualu dinanga diende ndia kashidi,

²⁰ ne Oge, mukalenga wa Bashane, bualu dinanga diende ndia kashidi.

²¹ Kufilaye buloba buabu ku bumpianyi, bualu dinanga diende ndia kashidi,

²² uvua mufile bumpianyi kudi Izrayele muena mudimu wende, bualu dinanga diende ndia kashidi.

²³ Patuvua mu dikenga kutuvulukaye, bualu dinanga diende ndia kashidi,

²⁴ kutusungidilaye kudi bena lukuna betu, bualu dinanga diende ndia kashidi.

²⁵ Udi upesha bifukibua bionsu tshiakudia, bualu dinanga diende ndia kashidi.

²⁶ Tuelayi Mvidi Mukulu wa mu diulu tuasakidila, bualu dinanga diende ndia kashidi!