Misambu 135 - MUKANDA WA MYIDI MUKULU

Maweja-Nangila udi munene

¹ Aleluya, Maweja-Nangila atumbe! Tumbishayi Maweja-Nangila, mutumbishayi nuenu badi bamukukuila,

² bimana mu nzubu wa tshijila wa Maweja-Nangila, mu lubanza lua nzubu wa Mvidi Mukulu wetu.

³ Tumbishayi Maweja-Nangila, bualu mmulenga; mutumbishayi mu biombelu, bualu mmulenga.

⁴ Maweja-Nangila mmusungule Yakobe, musungule Izrayele bua ikale tshintu tshiende.

⁵ Ndi mumanye ne: Maweja-Nangila udi munene; Mukalenga wetu mmupite mvidie yonsu.

⁶ Maweja-Nangila udi wenza bionsu bidiye musue, nansha mu diulu nansha pa buloba, nansha mu mayi manene, nansha mu kandondu ka buloba.

⁷ Udi ubandisha mavuba ku ntengu ya buloba, ulokesha mvula wa mipenya, utuma tshipepele tshikole.

⁸ Yeye kabidi nguvua mubutule bamuanabute ba bantu ne ba nyama mu ditunga dia Ejipitu.

⁹ Ku tshianza tshia batumibue bende, kuenzejaye bishima ne malu a dikema, — munda muebe wewe Ejipitu! — kukengeshaye mfumu wa bena Ejipitu ne bena mudimu bende bonsu.

¹⁰ Kutapaye bisamba bia bungi kubutulaye bakalenga ba lumu;

¹¹ bobu abu ke Sikone, mukalenga wa bena Amore, Oge, mukalenga wa Bashane ne bakalenga bonsu ba Kenaane.

¹² Kufilaye buloba buabu ku bumpianyi, ku bumpianyi bua tshisa tshiende tshia Izrayele.

¹³ Maweja-Nangila, lumu luebe ndua kashidi, udi Mvidi Mukulu mu nkama ne nkama ya bidimu.

¹⁴ Eyowa, Maweja-Nangila udi wakuila bantu bende, udi utabalela badi bamukukuila.

¹⁵ Mpingu ya bisamba bikuabu, nansha yoyi ya tshiamu tshitoke tshia mushinga mukole nansha tshia mpawungi, mbintu bienza kudi bantu.

¹⁶ Idi ne mukana, kayiyi yakula, idi ne mesu, kayiyi imona;

¹⁷ idi ne matshi, kayiyi yumvua. Kayena yakula nansha kakese!

¹⁸ Bantu badi bayenza nebayifuane! Kabidi yonsu udi mutekemena kudiyi neayifuane!

¹⁹ Nuenu bena Izrayele, elayi Maweja-Nangila tuasakidila. Nuenu batuangaji ba ku ndelanganyi ya Arone, elayi Maweja-Nangila tuasakidila.

²⁰ Nuenu bena levi, elayi Maweja-Nangila tuasakidila. Nuenu badi bitaba Mvidi Mukulu, elayi Maweja-Nangila tuasakidila.

²¹ Yerushalayime, ela Maweja-Nangila tuasakidila wa bungi, yeye ngudi muase pa mukuna wa Siyone. Aleluya, Maweja-Nangila atue ntunku!