Misambu 118 - MUKANDA WA MYIDI MUKULU

Londelayi bantu bidi Maweja-Nangila muenze

¹ Tumbishayi Maweja-Nangila, bualu udi mulenga, dinanga diende ndia kashidi.

² Bena Izrayele, ambayi ne: dinanga diende ndia kashidi.

³ Ndelanganyi ya Arone, ambayi ne: dinanga diende ndia kashidi.

⁴ Nuenu badi bitaba Maweja-Nangila, ambayi ne: dinanga diende ndia kashidi.

⁵ Pamvua mu dikenga, meme kubikila Maweja-Nangila, kungitabaye, kumpandisha.

⁶ Maweja-Nangila udi nanyi, tshiena ntshina tshintu. Bantu nebangenze tshinyi?

⁷ Maweja-Nangila udi nanyi, ungambuluisha, ndi mmona bundu bua baluishi banyi.

⁸ Mbimpe kukeba diambuluisha kudi Maweja-Nangila, pamutu pa kutekemena kudi muntu!

⁹ Mbimpe kukeba diambuluisha kudi Maweja-Nangila, pa mutu pa kukeba diambuluisha kudi bantu banene!

¹⁰ Bantu ba bisamba bia benyi bavua banjingile nseke yonsu, meme kubipata ku diambuluisha dia Maweja-Nangila.

¹¹ Bavua banjingile nseke yonsu, meme kubipata ku diambuluisha dia Maweja-Nangila.

¹² Bavua banduisha bu tshisumbu tshia mbulubulu, kadi kujiminabu bu mudi kapia kajima ku bisosa, meme kubipata ku diambuluisha dia Maweja-Nangila.

¹³ Bantu bavua bansakila bua meme kudishinda, kadi Maweja-Nangila kungambuluisha.

¹⁴ Maweja-Nangila ke buanyi bukole, udi ungambuluisha.

¹⁵ Bitabi ba Mvidi Mukulu badi bela mbila ya disanka, mu ntenta yabu bua lupandu ludibu bapete, bamba ne: “Diboku dia Maweja-Nangila nditshimune.

¹⁶ Diboku dia Maweja-Nangila didi ne bukole, diboku dia Maweja-Nangila nditshimune.”

¹⁷ Tshiena mfua to, nenshale ne muoyi, bua kulondela bantu bidi Maweja-Nangila muenze.

¹⁸ Bulelela, Maweja-Nangila udi munkengeshe, kadi kena munshipe to.

¹⁹ Ngunzuluilayi biibi bidi bitabi ba Maweja-Nangila babuela, bua mbuele, nye kutumbisha Maweja-Nangila!

²⁰ Tshiibi tshia kuya kua Maweja-Nangila tshidi apa; ke padi bantu ba Mvidi Mukulu babuelela.

²¹ Maweja-Nangila, nenkutumbishe, bualu uvua mungitabe, mungambuluishe.

²² Dibue divua bibaki ba nzubu bimanshe, ndishale mpindiewu mutu wa ditumba.

²³ Ewu mmudimu udi Maweja-Nangila muenze, udi wa dikema ku mesu kuetu.

²⁴ Dituku dia tshibilu divua Maweja-Nangila muenze ndiodi edi, nenku, tuelayi mbila ya disanka, tusanke.

²⁵ “Eyi, Maweja-Nangila, utuambuluishe, Maweja-Nangila, utukumishe dikasa dimpe!”

²⁶ — Mvidi Mukulu, ele muntu udi ubuela mu nzubu wende lupemba! Tudi tunuela lupemba mu dina dia Maweja-Nangila, mu nzubu wende wa tshijila.

²⁷ — Maweja-Nangila udi Mvidi Mukulu nkayende. Atutokeshe ne butoke buende! — Elayi tshijengu too ne ku tshilambuilu.

²⁸ Wewe Maweja-Nangila, udi Mvidi Mukulu wanyi, ndi musue kukutumbisha. Mvidi Mukulu wanyi, ndi musue kumanyisha bunene buebe.

²⁹ Tumbishayi Maweja-Nangila bualu udi mulenga, dinanga dienda ndia kashidi.