Misambu 115 - MUKANDA WA MYIDI MUKULU

Tutumbishe Mvidi Mukulu nkayende

¹ Maweja-Nangila kabatutumbishi tuetu, kabatutumbishi to, bakutumbishe amu wewe. Bualu wewe udi utunanga, muikale kabidi muena diyi dimue.

² Bantu ba bisamba bikuabu badi bakonka ne: “Mvidi Mukulu wabu udi penyi.”

³ Mvidi Mukulu wetu udi mu diulu, udi wenza bionsu bidiye musue.

⁴ Kadi mvidie yabu mmienza ne tshiamu tshitoke tshia mushinga mukole nansha ne mpawungi. Idi bintu bienza kudi bantu.

⁵ Idi ne mukana, kayena yakula. Idi ne mesu, kayena imona,

⁶ idi ne matshi, kayena iteleja, idi ne diulu, kayena yumvua mupuya,

⁷ idi ne bianza, kayena ilenga, idi ne makasa, kayena yenda. Idi ne muminu, kayena ipatula diyi.

⁸ Bantu badi bayifula, bikale bu yoyi! Bonsu badi bayitekemena, bayifuane!

⁹ — Nuenu bena Izrayele, tekemenayi kudi Maweja-Nangila. — Yeye ke udi unuambuluisha, unulama bu ngabu.

¹⁰ — Nuenu batuanganji, ndelanganyi ya Arone, tekemenayi kudi Maweja-Nangila. — Yeye ke udi unuambuluisha, unulama bu ngabu.

¹¹ — Nuenu bantu bende bapiabapia, tekemenayi kudi Maweja-Nangila. — Yeye ke udi unuambuluisha, unulama bu ngabu.

¹² — Maweja-Nangila udi utuvuluka, musue kutuela lupemba. — Ele bena Izrayele lupemba! — Ele ndelanganyi ya Arone lupemba!

¹³ — Ele bantu bonsu, baneme ne bapele badi batendelela Mvidi Mukulu lupemba!

¹⁴ — Maweja-Nangila atantshishe nzubu yenu, ne ya bana benu!

¹⁵ Maweja-Nangila anuele lupemba, bualu yeye ke udi mufuke diulu ne buloba!

¹⁶ Diulu ndia Maweja-Nangila, nkayende, kadi buloba mmubupeshe bantu.

¹⁷ Udi mua kutumbisha Maweja-Nangila nnganyi? — Bafue kabena mua kutumbisha Maweja-Nangila, mbaye mu muaba udibu bapuwa kashidi.

¹⁸ Kadi tuetu, netuele Maweja-Nangila tuasakidila, mpindiewu ne kashidi. Tutumbishayi Maweja-Nangila, Aleluya!