Misambu 108 - MUKANDA WA MYIDI MUKULU

Ndi musue kutabaja kubundubundu

¹ Musambu wa mu mukanda wa misambu ya Davide.

² Mvidi Mukulu, ndi mushindike ne: nenkuimbile misambu, nenkutumbishe ne muoyi wanyi mujima.

³ Lunzenze luanyi ne lunkombe luanyi, tabalayi, bualu nengambile kabundubundu bua kutabalaku.

⁴ Maweja-Nangila nenkutumbishe, munkatshi mua bantu, nenkuimbile misambu kumpala kua bisamba bia bantu,

⁵ bualu luse luebe ndunene, lupite ne diulu, bulelela buebe mbupite ne mavuba.

⁶ Mvidi Mukulu leja bunene buebe budi bupite diulu, butumbi buebe bukenkeshe buloba bujima!

⁷ Unsungidile ne tshianza tshiebe tshia balume, ungitabe, bua bantu bebe baudi munange bapande!

⁸ Mvidi Mukulu uvua muakule mu nzubu wende wa tshijila wamba ne: “Nentshimune, nengabanye tshimenga tshia Shekeme, nempande tshibandabanda tshia Sukote mu bitupa.

⁹ Ngilaade nguanyi, Menashe nguanyi kabidi, Efrayime ntshifulu tshianyi. Yuda ndikombu ndianyi dia bukalenga.

¹⁰ Mowabe udi dilongu dindi ngowela mayi. Ndi ngela tshisabata tshianyi mu Edome. Ndi ngela lubila lua mvita kudi bena Peleshete.”

¹¹ Udi mua kumfikisha ku Edome nnganyi? Udi mua kumpesha tshimenga tshiende tshidi tshikolesha ne bimana nnganyi?

¹² Anu wewe, Mvidi Mukulu, kadi udi mutubenge, kutshiena ufila biluilu bietu ku mvita to.

¹³ Utuambuluishe mu mvita yetu ne muluishi, bualu diambuluisha dia bantu didi tshianana.

¹⁴ Tuetu bikale nebe wewe Mvidi Mukulu, tudi tutshimuna, bualu wewe udi udiatakaja baluishi betu panshi.