Misambu 107 - MUKANDA WA MYIDI MUKULU

MUKANDA MUITANU (Misambu 107—150 ) Mvidi Mukulu musungidi tuasakidila

¹ Maweja-Nangila, tuasakidila, bualu udi ne malu mimpe, dinanga diebe kadiena ne ndekelu.

² Ke mudibu mua kuamba nanku, kudi bantu badi Maweja-Nangila mupikule, kudi bantu bavuaye musungidile mu bianza bia baluishi,

³ kudi bavuaye mukunguje muaba umue, pavuabu batangalake mu matunga onsu, a kudi diba dipatukila ne dibuelela, a ku mutu ne a kuinshi kua ditunga.

⁴ Kulalakanabu mu tshipela, mu njila ya lusenga, nanshabu kumona njila wa kuya ku musoku uvua bantu basombe.

⁵ Kukengabu ne nzala ne nyota, kutekeshabu mu maboku.

⁶ Nenku mu dikenga diabu, kubikilabu Maweja-Nangila yeye kubapandisha ku dikenga.

⁷ Kubalombolaye mu njila mululame, wa kuya ku musoku udi bantu basombe.

⁸ Basakidile Maweja-Nangila bua malu ende mimpe, bua malu ende a kukema adiye muenzele bantu.

⁹ Bualu udi mupeshe bavua ne nyota mayi a kunua, mubumbuile bavua ne nzala bivuabu bakengela.

¹⁰ Bakuabu bavua mu dikenga, babasuika nkanu, basombe mu nzubu wa lukanu wa miidima.

¹¹ Bualu bavua batombokela Mvidi Mukulu, bavua bapetule mikenji ya Muena kulu.

¹² Yeye kubapuekesha mu miidima mikole, kakuvua muntu uvua mua kubajula.

¹³ Nenku mu dikenga diabu, kubikilabu Maweja-Nangila, yeye kubasungidila mu dikenga.

¹⁴ Kubapatulaye mu nzubu wa lukanu wa miidima, kutshibula nkanu yabu.

¹⁵ Basakidile Maweja-Nangila bua malu ende mimpe, ne bua malu ende a kukema adiye muenzele bantu.

¹⁶ Bualu udi mutshibule biibi bia tshiamu tshikunze, udi mutshibule milonda ya kupayika ku biibi.

¹⁷ Bantu batshimbakane badi badikebela makenga, ku nsombelu wabu mubi, ne ku malu mabi adibu benza.

¹⁸ Biakudia bionsu mubafikile ku muoyi, bakavua dikasa mu lukita.

¹⁹ Nenku mu dikenga diabu, kubikilabu Maweja-Nangila ne mbila mikole, yeye kubasungidila ku dikenga diabu.

²⁰ Wamba amu diyi dimue, kubondapaye, kubasungidilaye ku lufu.

²¹ Basakidile Maweja-Nangila bua malu ende mimpe, ne bua malu ende a kukema adiye muenzele bantu!

²² Balambule Mvidi Mukulu milambu ya kuela tuasakidila, bele mbila ya disanka bambile bantu malu adiye muenze.

²³ Bakuabu kuendakana ne majuwa pa mayi manene, benza midimu yabu pa mayi manene.

²⁴ Kumonabu bukole bua Maweja-Nangila, ne malu a kukema adiye wenza pa mayi manene.

²⁵ Yeye kuakula, tshipepela tshikole kujuka, kujulatshi mavuala mavule pa mayi.

²⁶ Majuwa abu kubanda wu mulu, kupulumukawu mu mitubu, bavua ba lufu mu mayi manene.

²⁷ Bavua ne tshinyingu, bavua batetuka, bu mudi muntu mukuatshika maluvu. Meji abu onsu avua matutubile.

²⁸ Nenku mu dikenga diabu kubikilabu Maweja-Nangila, yeye kubasungidila ku dikenga.

²⁹ Yeye kutuyisha tshipepela, mavuala kubatama.

³⁰ Bobu kusanka, bualu mavuala avua mabatame. Maweja-Nangila kubafikisha ku dilobu divuabu basue.

³¹ Nenku basakidile Maweja-Nangila bua malu ende mimpe, ne bua malu ende a kukema adiye muenzele bantu!

³² Bamutembe mu bisangilu biabu, bamutumbishe mu tshipangu tshia bakulu.

³³ Yeye ke udi ukudimuna misulu ya mayi yenza tshipela, ne miaba ya mayi ya mu tshipela yenza buloba bume,

³⁴ buloba bua bufuke buenza bua lusenga, pikala badi basombapu benza malu mabi.

³⁵ Udi ukudimuna kabidi tshipela tshienza dijiba dia mayi, ne buloba bume buenza muaba udi mayi.

³⁶ Udi usombesha badi ne nzala mu miaba eyi, basamu nzubu ya kusomba.

³⁷ Badi bakuna maminu mu madimi, bakuna mionji ya mvinyo, bapola bimuma.

³⁸ Maweja-Nangila udi ubela lupemba, udi ubavudija ba bungi, kena ukepesha bimuna biabu nansha.

³⁹ Kadi bakuabu badi benda bakepela, babakengesha kudi bupika, kudi dikenga ne lutatu.

⁴⁰ Maweja-Nangila udi upepeja baneme, ubalekela balalakana mu tshipela, kabayi bamona njila.

⁴¹ Udi usungidila bapela ku dikenga, uvudija meku abu bungi bu mikoku.

⁴² Bantu bakane badi bamona basanka, kadi bantu babi badi bapuwa.

⁴³ Muntu udi ne meji avuluke malu aa, ajingulule ne Maweja-Nangila udi ne malu mimpe.