Misambu 106 - MUKANDA WA MYIDI MUKULU

Mvidi Mukulu udi ne diyi dimue, bena Izrayele kabena nadi

¹ Tumbishayi Maweja-Nangila, Aleluya! Tumbishayi Maweja-Nangila bualu udi ne malu makane, dinanga diende kadiena ne ndekelu.

² Udi mua kuambila bantu malu a bulobu bua Maweja-Nangila, ne kubaleja butumbi buende nnganyi?

³ Badi bakosa nsambu biakane, ne badi benza malu makane misangu yonsu badi ne disanka.

⁴ Maweja-Nangila, wewe udi upita kufuila bantu bebe luse, utuvuluke. Wewe musungidi, utusungidile.

⁵ Nanku netumone diakalenga dia bantu baudi musungule, netumvue disanka didi nadi bantu bebe, netutue ntunku pamue ne bantu ba mu bumpianyi buebe.

⁶ Tudi benza malu mabi avua batatu betu benze, tudi benza bibi, tudi bapila.

⁷ Pavua batatu betu mu Ejipitu, kabavua bajingulule malu a kukema a Maweja-Nangila, kabavua bavuluke malu ende makane mapite bungi. Kumutombokelabu pabuipi ne mayi manene a Luepu.

⁸ Kadi kubasungidilaye bua lumu luende. bua kulejaye bantu bukole buende.

⁹ Kukanyinaye mayi manene a Luepu, kukamawu diakamue, kupitshishaye bantu bende mu dijimba dile bu mudibu benda mu tshipela.

¹⁰ Kubasungidilaye kudi bavua babakina, kubanyenga mu bianza bia muluishi.

¹¹ Mayi kubuikila baluishi babu, kakuvua kupanda nansha muntu umue.

¹² Kuitababu tshivua Mvidi Mukulu muambe, kumutumbishabu ne misambu.

¹³ Kupuabu malu avuaye muenze muoyi lukasa, kubenga kuindila bua enze malu avuaye mupangadike.

¹⁴ Kujingabu bikole bintu bivuabu kabayi nabi, kutetabu Mvidi Mukulu mu tshipela.

¹⁵ Mvidi Mukulu kubapesha munyinyi uvuabu balombe, kuudiabu too kuleuka.

¹⁶ Mu mitanda muvuabu, kutekelabu Moshe ne Arone, muena mudimu wa tshijila wa Maweja-Nangila lubabu.

¹⁷ Buloba kunzuluka, kuminabu Datane, kujibikilabu bavua bumvuangana ne Abirame.

¹⁸ Kapia kuoshaku bena tshisumbu tshiabu, ludimi lua kapia kuvingutula bantu babi.

¹⁹ Kuenzabu kana ka ngombe ku mukuna wa Orebe, kutendelelabu tshiamu tshivuabu bengulule.

²⁰ Pa muaba wa Mvidi Mukula uvua butumbi buabu, kupingajabu lupingu lua ngombe udiadia bisosa.

²¹ Kubengabu kuvuluka Mvidi Mukulu musungidi wabu, uvua mubenzele malu manene mu Ejipitu,

²² mubenzele malu a kukema mu ditunga dia Kame, ne malu adi akuatshisha bowa ku mayi manene a Luepu.

²³ Mvidi Mukulu kuamba ne: Ndi mbabutula, kadi Moshe, muntu uvuaye musungule, kuimanaye pankatshi, umukandika bua kayi kubutula bantu bonsu mu tshiji.

²⁴ Pashishe kupetulabu ditunga divuabu bajinga, kubengabu kuitaba dilaya dia Mvidi Mukulu.

²⁵ Kununganabu mu ntenta yabu, kubengabu kuteleja tshivua Mvidi Mukulu wamba.

²⁶ Nenku, kuelaye tshianza mulu, kuditshipa, bua kubashipaye mu tshipela,

²⁷ bua kutangalaja ndelanganyi yabu miaba yonsu, ne kufuilayi mu bisamba bia benyi.

²⁸ Kudilamikabu kudi mvidie Baale ku Peyore, kudiabu milambu milambula bafue.

²⁹ Kufikishabu Maweja-Nangila tshiji, tshipupu kubuela munkatshi muabu.

³⁰ Kadi Pinase, kujuka, kubalumbuluila, tshipupu kujika.

³¹ Maweja-Nangila kumuanyisha kashidi, ne bikondu bionsu bidi kumpala.

³² Kukuatshishabu Maweja-Nangila tshiji ku mayi a Meriba, kukebelabu Moshe dikenga:

³³ bu muvuabu bamufikisha munda, kuakulaye kayi muele meji.

³⁴ Kabavua babutule bena Kenaane, bu muvua Maweja-Nangila mubambile.

³⁵ Kadi kubuelakanabu ne bantu ba bisamba bia benyi, kulongabu mua kuenza malu avuabu benza.

³⁶ Kutendelelabu mvidie yabu, kuponabu mu buteyi bua kutendelela mvidie.

³⁷ Kulambulabu mvidie ya tshianana, bana babu ba balume ne ba bakaji.

³⁸ Kumatshishabu mashi a bantu bavua kabayi ne tshilumbu panshi, — mashi a bana babu ba balume ne ba bakaji, bavuabu bashipela mvidie yabu ya bena Kenaane, — dishipa dia bantu adi kunyangadi ditunga.

³⁹ Pakenzabu malu aa, kudipishabu mikiya, mbuendenda mene.

⁴⁰ Maweja-Nangila kukuatshila bantu bende tshiji, kukinaye ba mu bumpianyi buende.

⁴¹ Kubafilaye mu bianza bia bisamba bia benyi, kubakokeshabu kudi bantu bavua babakina.

⁴² Baluishi babu kubakengesha, kubafuisha bundu.

⁴³ Misangu ya bungi Maweja-Nangila uvua ubapandisha, kadi bobu bavua bamutombokela bua tshishiku tshiabu.

⁴⁴ Maweja-Nangila kumvua miadi yabu, kumonaye dikenga diabu.

⁴⁵ Kuvulukaye ndondu wende bu mudiye ne luse, kukudimunaye meji ende.

⁴⁶ Kutekaye muoyi wa luse munda mua bantu bonsu, bavua babakuate ku bupika.

⁴⁷ Maweja-Nangila Mvidi Mukulu wetu, utusungidile, utumbushe mu bisamba bia benyi, utusangishe pamue, bua bitumbishe dina diebe dia tshijila, tutue ntunku bua butumbi buebe.

⁴⁸ Maweja-Nangila Mvidi Mukulu wa bena Izrayele, tuasakidila! Nuele Maweja-Nangila tuasakidila misangu yonsu. Bantu bonsu bambe ne: “Amene, eyo, bikale nanku! Tutumbishayi Mvidi Mukulu, Aleluya!”