Misambu 10 - MUKANDA WA MYIDI MUKULU

¹ Maweja-Nangila, udi muimanyine kule bua tshinyi? Udi musokome patudi mu dikenga bualu kaayi?

² Bantu babi kabayi bundu, badi bakengesha bapele. Badi babakuata mu mateyi avuabu bateya.

³ Muntu mubi udi uditambisha bua buenzayi buende. Muena lubombu udi utshipa Maweja-Nangila, umuseka.

⁴ Muntu mubi udi wela mpala mulu, wamba ne: “Mvidi Mukulu kena unyoka muntu. Kenaku mene.” Ke meji onsu adi muntu mubi wela.

⁵ Bionsu bidiye wenza bidi biya kumpala. Paudi ukosa tshilumbu tshiende, kabiena bimuenzela bualu, bualu wewe udi kulu kule!

⁶ Udi wamba ne: “Tshiakutenkakana, kashidi dikenga kadiakunkuata!”

⁷ Udi amu utshipa bantu, ubashima, ubadinga. Bidiye wamba bidi bikebela bantu dikenga ne diakabi.

⁸ Udi musombe mualamine pabuipi ne misoku, windila bua kushipa bantu badi kabayi ne bualu. Mesu ende adi alondesha muntu udi kayi ne bukole.

⁹ Udi ulala muaba musokome, utentekela bu ntambue, mualamine mupele bua kumukuata. Udi ukoka muena dikenga, umukuata mu bukondu.

¹⁰ Udi uzonzoma, ubutamina, ukuata bantu badi kabayi ne mubaluidi.

¹¹ Muntu mubi udi wela meji ne: “Mvidi Mukulu kena bualu ne bindi ngenza. Kena musue kubimanya, kena musue kubimona!”

¹² Maweja-Nangila juka, Mvidi Mukulu nyoka bantu babi! Kupu bena dikenga muoyi!

¹³ Mudi bantu babi bakupotela mmunyi? Mmunyi mudibu bamba ne: Mvidi Mukulu kakutunyoka?

¹⁴ Kadi wewe kuena mpofu! Udi umona dikenga ne disumpakana dia bapele! Udi amu ukeba kubambuluisha! Muena dikenga mmudilekelela kuudi! Wewe ke udi wambuluisha muana nshiya.

¹⁵ Butula bukole bua muena tshikisu. Umunyoke bua bubi budiye muenze, bua ajimine kashidi.

¹⁶ Maweja-Nangila udi Mukalenga kashidi tshiendelele. Badi batendelela mvidie mikuabu nebajimine mu ditunga diende!

¹⁷ Maweja-Nangila, wewe udi umvua majinga a bantu bapuekele, ubakolesha ku muoyi. Wewe udi uteleja ne ntema bua kubambuluisha,

¹⁸ miadi ya bana ba nshiya ne ya bantu badibu bakengesha. Nanku pa buloba kapakuikala kabidi muena tshikisu.