Mika 3 - MUKANDA WA MYIDI MUKULU

Badi babela bamfumu

¹ Nuenu bamfumu ba ndelanganyi ya Yakobe, nuenu bakoshi ba nsambu ba bena Izrayele, ndi nnukonka ne: “Mudimu wenu kawena wa kukosa nsambu pa yoyi anyi?

² Kadi, nudi nukina malu mimpe, nunanga malu mabi! Nudi nuvula bantu too ne ku dikoba dia pambidi! Nudi nutula too ne minyinyi idi ku mifuba yabu.”

³ Nudi nudia munyinyi wa bantu banyi. Nudi nuvula dikoba diabu, nuzaza mifuba yabu, nukosa munyinyi wabu mabulu mabulu, bu mudibu bakosa munyinyi udibu bela mu luesu.

⁴ Nanku bobu badidila Maweja-Nangila bua abambuluishe, Maweja-Nangila kena ubumvuila. Kadi neabakome nyima, bua malu mabi avuabu benze.

Bambi badi badinga Izrayele

⁵ Telejayi bidi Maweja-Nangila wamba, bua bambi badi badinga bantu banyi. Udi wamba ne: “Bambi badi bambila bantu ne: ditalala didiku, amu padibu babafuta difutu dia bungi. Kadi muntu udi kayi ubapesha biakudia, badi bamuluisha mvita.

⁶ Nenku, nuenu bambi, tshiakunuleja kabidi malu adi kumpala, tshiakunumanyisha kabidi tshindi musue. Miidima neyinunyunguluke. Butuku nebunuvuile. Kanuakumona kabidi tshintu, bu dituku didi diba dimane kubuela.”

⁷ Bantu bonsu badi bamba malu adi kaayi manji kuenzeka, nebadibuikile bilamba ku mesu, bua kusokoka bundu buabu, bualu Mvidi Mukulu kena ukumbaja bidibu bamba.

⁸ Kadi meme ndi ne bukole bua bungi. Maweja-Nangila mmunguwuje ne Mueyelu wende. Ndi ndongesha bantu ne muoyi mukole, mbambila bidibu ne bua kuenza. Ndi mbela bena Izrayele, ndelanganyi ya Yakobe, bua balekele kutombokela Maweja-Nangila, bakumbaje tshidiye musue.

Mika udi udianjila kumanyisha dibutuka dia Yerushalayime

⁹ Ndi nnubela nuenu, bamfumu ba ndelanganyi ya Yakobe, ne bakoshi ba nsambu ba bena Izrayele. Nudi nubenga kuenza malu mimpe, nukosa bilumbu bibi.

¹⁰ Nudi nuibaka Yerushalayime, tshimenga tshia Mvidi Mukulu, ne mashi a bantu banudi nushipa, ne bintu bia banudi nukengesha.

¹¹ Bakoshi ba nsambu badi balumbuluisha bantu, amu padibu bamane kudia mabuejila. Batuangaji badi balongesha mikenji, amu bua kupeta difutu. Bambi badi bambila bantu malu, amu bamane kupeta makuta. Kadi badi badiamba ne: “Tudi bantu ba Maweja-Nangila! Maweja-Nangila udi netu! Bualu bubi nansha bumue kabuena mua kutukuata.”

¹² Nanku bualu buenu, Siyone neikale bu budimi, budibu babundulula ne lukasu. Yerushalayime neashale makolu. Mukuna wa nzubu wa Mvidi Mukulu nebaubuikile kudi tshipuka.